CNN: Rusiyada müharibəyə getmək istəyənlərin sayı azalır, yüksək ödənişlər də nəticə vermir
Rusiyada hərbi xidmət üçün müqavilə imzalayaraq müharibəyə getmək istəyənlərin sayı getdikcə azalır. Hətta on minlərlə dollar həcmində təklif olunan ödənişlər də vəziyyəti dəyişmir.
Crossmedia.az xəbər verir ki, bu barədə CNN məlumat yayıb.
Məlumata əsasən, yeni kontrakt hərbçiləri cəlb etmək üçün Rusiya tərəfi təxminən 80 min dollara qədər birdəfəlik ödənişlər, borcların silinməsi və digər əlavə imtiyazlar təklif edir. Eyni zamanda hərbi xidmətlə bağlı reklamlar televiziya, sosial şəbəkələr və reklam lövhələrində geniş şəkildə yayımlanır.
Buna baxmayaraq, CNN yazır ki, maraq yenə də aşağı səviyyədə qalır. Bildirilir ki, bu ilin birinci rübündə kontrakt əsasında orduya qəbul olunanların sayı ötən ilin eyni dövrü ilə müqayisədə 20% azalıb.
Eyni zamanda qeyd olunur ki, döyüşlərdə itkilər davam edir və hətta artma tendensiyası göstərir. Qərb kəşfiyyatlarının qiymətləndirmələrinə görə, Rusiya aylıq olaraq cəbhədə on minlərlə hərbçi itirir.
Məlumatda həmçinin bildirilir ki, bu çatışmazlığı aradan qaldırmaq üçün məhbusların döyüşlərə cəlb edildiyi, Şimali Koreya hərbçilərinin istifadə olunduğu və miqrantların da aktiv şəkildə hərbi xidmətə cəlb edildiyi qeyd olunur.
CNN əlavə edir ki, bu vəziyyət fonunda Rusiya iqtisadiyyatı da təzyiq altındadır: müəssisələr işçi çatışmazlığından şikayətlənir, maaşlar isə inflyasiyanın artım tempinə çata bilmir.
21:42 14.06.2026
Oxunuş sayı: 61
