Quş ətinə təlabat artıb: Qiymətlər bahalasır - Rəy
Azərbaycanda son vaxtlar davaq xəstəliyinin yayılması ilə bağlı narahatlıqlar cəmiyyətin qida istehlakı vərdişlərinə birbaşa təsir göstərməkdədir. Xəstəliyin bəzi bölgələrdə müşahidə olunması nəticəsində insanlar ət məhsullarının mənşəyi və təhlükəsizliyi məsələsinə daha diqqətlə yanaşmağa başlayıblar.
Əvvəllər bazarda əsas tələbat iribuynuzlu heyvan ətlərinə, yəni mal və qoyun ətinə yönəlmişdisə, hazırda bu tendensiyada əks istiqamətli dəyişiklik müşahidə olunur. Bir çox istehlakçılar iribuynuzlu heyvan ətindən imtina edərək, daha yüngül və zərif hesab olunan quş ətinə, xüsusən də hinduşka ətinə üstünlük verməyə başlayıblar. Bunun səbəbi həm sağlam qidalanma amilləri, həm də bazarda hinduşka ətinin nisbətən az riskli və etibarlı hesab olunmasıdır.
Bu vəziyyət nəticəsində hinduşka ətinə olan tələbatın kəskin artması bazar qiymətlərinə də təsir göstərib. Əvvəllər nisbətən sabit olan hinduşka ətinin qiyməti son günlərdə müəyyən artım nümayiş etdirir. Mütəxəssislər bu artımı həm təklifin məhdudluğu, həm də əhalinin davranış dəyişiklikləri ilə izah edirlər.
Ümumilikdə, davaq xəstəliyinin yayılması təkcə baytarlıq və sağlamlıq sahələrinə deyil, həm də istehlak bazarına və iqtisadi tarazlığa təsir edən mühüm amilə çevrilmişdir.
Məsələ ilə bağlı marketoloq Müşviq İsgəndərov Crossmedia.az-la öz fikirlərini bölüşüb:
"Ümumiyyətlə, bu kimi hadisələr tarix boyu təkrarlanan və qaçınılmaz proseslərdəndir. Bu vəziyyət təkcə heyvandarlıq və canlı məhsulları üçün deyil, ümumilikdə bütün istehlak bazarlarında müşahidə olunur. Belə ki, hər hansı məhsulla bağlı yayılan mənfi məlumatlar və ya formalaşmış ictimai rəy həmin məhsulun bazardakı satış tempi və tələbat səviyyəsinə mənfi təsir göstərir.
Lakin təcrübə göstərir ki, istər yerli, istərsə də beynəlxalq markalar bu cür böhranları qısa müddətdə adlaya bilirlər. Xüsusilə bazarda yüksək tələb görən məhsullar üçün bu hallar çox zaman “boom effekti” adlanan müvəqqəti yüksəliş və eniş dövrü ilə müşayiət olunur. Marketinqdə “boom effekti” məhsulun qısa müddətli populyarlıq və ya eniş dövründən sonra yenidən sürətli inkişaf mərhələsinə keçidini ifadə edir.
Düşünürəm ki, hazırkı vəziyyət də bu qəbildəndir. Proses qısa müddətdə sabitləşəcək, bazarda təklif və tələbin nisbəti yenidən tarazlaşacaq, qiymətlər isə əvvəlki səviyyəsinə qayıdacaq".
Elmir Heydərli
15:01 11.11.2025
Oxunuş sayı: 8025
