Gənclər və İdman

Ravin Alməmmədov: "Artıq böyüklər arasında da uğurlar qazanmaq niyyətindəyəm"

Azərbaycan ağırlıqqaldıranı Ravin Alməmmədov (79 kq) gələcək yarışlarda böyüklər arasında mübarizə aparacaq.

Crossmedia.az xəbər verir ki, idmançı bu barədə Bakıdakı qarşılama mərasimində jurnalistlərə açıqlama verib.

Albaniyanın Dürres şəhərində 20 və 23 yaşadək idmançılar arasında keçirilmiş Avropa birinciliyində qızıl medal qazanan idmançı Ermənistan təmsilçiləri ilə eyni çəkidə yer almağın ona əlavə təzyiq yaratmadığını söyləyib:

"Mənim üçün bunun heç bir fərqi yoxdur. Psixoloji olaraq heç bir təzyiq yaratmır. İnanıram ki, bundan sonra daha da yaxşı nəticələr əldə edəcəyəm. Azərbaycan Ağırlıqqaldırma Federasiyasının rəhbərliyinə, məşqçilərimə təşəkkür edirəm. Onların üzərimizdə böyük əziyyəti var".

Turnirdə üç gümüş medal qazanan Azərbaycan ağırlıqqaldıranı Tehran Məmmədov (64 kq) yarışa yaxşı hazırlaşdıqlarını söyləyib:

"Öz çıxışımdan razıyam. Artıq böyüklər arasında yarışlara qatılacağam. Orada da yeni uğurlar qazanmaq niyyətindəyəm. Özümə inanıram".

🖨 Çap et

18:58 05.11.2025

Oxunuş sayı: 1379