İsrail ordusunda intiharların sayı rekord həddə çatıb – ABŞ mətbuatı
İsrail Müdafiə Qüvvələrində (İDF) son iki il ərzində intihar və psixoloji pozğunluqlar görünməmiş səviyyəyə yüksəlib.
Crossmedia.az xarici KİV-ə istinadən xəbər verir ki, HƏMAS-İsrail müharibəsinin başlamasından bu yana 11 mindən çox əsgərə travma sonrası stress pozğunluğu (PTSR) diaqnozu qoyulub.
Qəzet yazır ki, bu, İsrail ordusu üçün indiyədək müşahidə olunmamış göstəricidir və ölkənin tarixində ən uzunmüddətli silahlı münaqişənin nəticəsi sayılır. Bundan əlavə, İDF son iki ildə azı 37 əsgərin intihar hadisəsini araşdırır. Müqayisə üçün, 2014-cü ildə Qəzza zolağında baş verən 50 günlük müharibə zamanı bu rəqəm üç dəfə az olub.
Məqalədə qeyd olunur ki, İsrail hərbi rəhbərliyi problemin qarşısını almaq üçün əsgərlərə döyüş meydanında ilkin psixoloji yardımın göstərilməsini öyrədir, qaynar xətləri genişləndirir və hərbi həkimlərin sayını artırır. Lakin ekspertlərin sözlərinə görə, bir çox həkimlər PTSR-in simptomlarını vaxtında müəyyən edə bilmədikləri üçün on minlərlə əsgər müalicə olunmadan qalır.
Ekspertlər xəbərdarlıq edir ki, bu hal orduda ciddi sosial-psixoloji böhrana və döyüş qabiliyyətinin zəifləməsinə səbəb ola bilər.
19:00 09.10.2025
Oxunuş sayı: 8473
