Azərbaycan Dəmir Yollarında yeni əsrin marşrutu: Gəncə–Mingəçevir–Ağstafa
Müstəqil Azərbaycan dövləti bütün istiqamətlərdə olduğu kimi, nəqliyyat infrastrukturunun modernləşdirilməsi və regionların dayanıqlı inkişafının təmin edilməsi sahəsində də ardıcıl tədbirlər həyata keçirir. Son illərdə həyata keçirilən dövlət proqramları və sosial-iqtisadi inkişaf strategiyaları nəticəsində ölkəmizdə dəmir yolu nəqliyyatı yenidən dirçəlmiş, həm daxili, həm də beynəlxalq daşımaların həcmi əhəmiyyətli dərəcədə artmışdır.
Xüsusilə sərnişindaşıma xidmətinin keyfiyyətinin yüksəldilməsi, müasir texnologiyaların tətbiqi və əhalinin rahat, təhlükəsiz səyahət imkanlarının genişləndirilməsi “Azərbaycan Dəmir Yolları” Qapalı Səhmdar Cəmiyyətinin qarşıya qoyduğu əsas hədəflərdəndir. Paytaxtla yanaşı, regionlarda da insanların mobilliyinin artırılması, şəhər və rayonlararası əlaqələrin gücləndirilməsi dövlətin sosial-iqtisadi siyasətinin mühüm tərkib hissəsini təşkil edir.
Məhz bu çərçivədə ölkəmizdə dəmir yollarının yaranmasının 145 illiyində mühüm bir addım atılaraq, ilk dəfə regiondaxili marşrut üzrə – Gəncə–Mingəçevir–Ağstafa istiqamətində müasir elektrik qatarlarının hərəkətə başlaması nəzərdə tutulur. Bu yenilik təkcə sərnişinlərin rahatlığına xidmət etməklə kifayətlənmir, həm də bölgələrin sosial-iqtisadi inkişafına, turizm potensialının genişlənməsinə, paytaxt və regionlar arasında tarazlı inkişafın təmin edilməsinə mühüm töhfə verəcək.
Məsələ ilə bağlı Crossmedia.az-a açıqlama verən Milli Məclisin deputatı Müşviq Cəfərov bildirib ki, bu xəttin açılmasında əsas məqsədi qərb bölgəsində olan şəhərlərimizi, rayonlarımızı birləşdirməkdir: "Xüsusilə də Gəncə, Mingəçevir və Ağstafa ilə olan əlaqələri dəmir yolu üzərindən həyata keçirməkdir. Bu, həm turizmin inkişafına xidmət etmiş olacaq, həmçinin əhalinin komfortlu qatarlardan istifadə edərək təhlükəsiz şəkildə mənzil başına çatmasına kömək edəcək. Yəni bu qatar xəttinin bir çox üstünlükləri var.
Bunun regionda paytaxtdan kənar şəhər və rayonları birləşdirən ilk layihə olduğunu nəzərə alsaq, bu cür layihələrin gələcəkdə daha çox olacağına inanıram. Bu qatar xətləri yalnız paytaxtla şəhərləri, rayonları birləşdirməyəcək, həmçinin regionların öz aralarında da olacaq. Çünki bu gün artıq Qarabağda da Ağdama qatar xətti yaradılıb. Qarşıdakı illərdə bunun Xankəndiyə də çatdırılması nəzərdə tutulub. Bu habın regionlararası olması regionların inkişafına, o cümlədən daşımaçılığa çox müsbət xidmətləri olacaq".
Milli Məclisin deputatı Aydın Mirzəzadə ADY-nin çox unikal və tələblərə cavab verən bir layihəyəyə başladığını vurğulayıb: "Bu dəmir yolunun açılması regionlararası iqtisadi əlaqələrin güclənməsinə, tələbə mübadiləsi, eyni zamanda insanların istirahətinin mütəşəkkil təşkilində böyük rol oynayacaq. Bir neçə regionun resurslarının bir-biri ilə əlaqədə olmasına səbəb olacaq. Bu yolun həm Mingəçevirdə, həm də Gəncə, Ağstafa zonasında açılması böyük maraqla qarşılandı”.
Deputat həmçinin, bu layihənin cənab Prezidentin regionların sosial-iqtisadi inkişaf təşəbbüslərinin həyata keçirilməsində böyük bir iş kimi hesab edilə biləcəyini bildirib.
Əlamətdar hadisə ilə bağlı Milli Məclisin deputatı Naqif Həmzəyev də fikirlərini bölüşüb: "Bildiyiniz kimi, bugün çox tarixi bir hadisə yaşandı. İlk dəfədir ki, paytaxta birbaşa bağlı olmadan regionlararası qatar reysi xidmətə başladı. Bu, Gəncə-Mingəçevir-Ağstafa istiqamətində gündə iki dəfə hərəkət edəcək qatar reysidir.
Bu, həqiqətən də Qərb regionu üçün çox vacib bir hadisədir. Birbaşa olaraq Gəncə şəhərini həm Mingəçevir, həm də Ağstafa istiqamətində yerləşən şəhər və rayonlarla birləşdirən bu xəttin gün ərzində iki dəfə xidmət göstərməsi insanlar üçün böyük rahatlıq təmin edəcəkdir. Səhər saatlarında bu xidmətdə təhlükəsizlik, rahatlıq və büdcə məsələləri xüsusi önəm daşıyır.
Çünki şəhərlərarası taksi və ya digər nəqliyyat vasitələrindən istifadə edildikdə səhərlər xərclər daha çox olur. Ancaq tariflərə baxdıqda görürük ki, qatar vasitəsi ilə bu xidmət həm rahat, həm də maddi baxımdan çox əlverişlidir. Eyni zamanda, inanıram ki, bu qatar reysi yaxın gələcəkdə Gəncə və Qərb bölgəsi ilə digər regionlar arasında da qatar nəqliyyatının inkişafına səbəb olacaqdır".
Deputat həmçinin gələcək dövrlər üçün bu xətlərin daha da genişləndiriləcəyini bildirib.
"Qismət olsa, tezliklə Ağstafa-Gəncə istiqamətində, həmçinin Xankəndi, Bərdə, Ağdam və yaxın gələcəkdə Lənkəran istiqamətində səhər reyslərinə şahidlik edə biləcəyik. Hətta bu xəttin inkişafı çərçivəsində yaxın gələcəkdə Gəncə-Qəbələ səhər reyslərini də təşkil edə bilərik. Bir sözlə, əməyi keçən hər kəsə təşəkkür edir və bu xəttin istifadəyə verilməsi münasibətilə hər kəsi təbrik edirəm"- deyə o əlavə edib.
Elmir Heydərli
15:44 26.09.2025
Oxunuş sayı: 2268
