"The Economist": Neft 63 dollardək ucuzlaşacaq, qaz bazarında dalğalanma olacaq
2025–2026-cı illərdə neft ucuzlaşacaq, qaz bazarında dalğalanma olacaq.
Crossmedia.az xəbər verir ki, bu barədə “The Economist Group”un araşdırma və təhlil bölməsi olan “Economist Intelligence Unit”in (EIU) proqnozunda bildirilib.
Məlumata görə, 2025-ci ildə Brent markalı neftin orta qiyməti 67,1 ABŞ dolları/barel, 2026-cı ildə isə 63 dollar/barel səviyyəsində gözlənilir. Bu, əvvəlki illə müqayisədə neft bazarında azalma tendensiyasının davam edəcəyini göstərir.
Təbii qaz bazarında Henry Hub üzrə qiymətin 2025-ci ildə 4,1 dollar/mmBtu-a yüksələcəyi, 2026-cı ildə isə eyni səviyyədə qalacağı proqnozlaşdırılır. Avropa bazarında isə 2025-ci ildə qazın qiymətinin 12,1 dollar/mmBtu, 2026-cı ildə isə azalaraq 9,3 dolllar/mmBtu təşkil edəcəyi gözlənilir.
EIU-nun qiymətləndirməsinə görə, yaxın iki ildə dünya enerji bazarını neft qiymətlərində eniş, qaz bazarında isə kəskin dəyişkənlik müşayiət edəcək.
Qeyd edək ki, bu il üzər Azərbaycan neftinin büdcədə orta qiyməti 70 dollar, gələn il üzrə isə 65 dollar müəyyən edilib.
10:04 26.09.2025
Oxunuş sayı: 6917
