4 ay ərzində "Coursera"da 30 min Azərbaycan vətəndaşı sertifikat əldə edib
Son dörd ay ərzində “Coursera” platformasında 30 min Azərbaycan vətəndaşı 63 minə yaxın sertifikat əldə edib.
Crossmedia.az xəbər verir ki, bu barədə Azərbaycanın İqtisadiyyat Nazirliyi yanında Dördüncü Sənaye İnqilabının Təhlili və Koordinasiya Mərkəzinin (4SIM) icraçı direktoru Fariz Cəfərov Bakıda keçirilən I Azərbaycan Beynəlxalq İnvestisiya Forumunda etdiyi çıxışda deyib.
“Biz “Coursera” ilə əməkdaşlıq edirik: ötən il 70 min azərbaycanlının 12 mindən çox tədris proqramına pulsuz çıxışını təmin edən iri miqyaslı saziş bağlanıb. 2026-cı ilin aprel ayına kimi biz bunun 70 min nəfəri əhatə etməyini planlaşdırırq. Hədəfimiz bacarıqlarda olan boşluqların tez bir zamanda doldurulmasıdır”, - deyə o bildirib.
Onun sözlərinə görə, rəqəmsal iqtisadiyyat strategiyası çərçivəsində əlavə 50 layihənin gerçəkləşdirilməsi planlaşdırılır. Həmin layihələr ÜDM üçün əlavə dəyər yaradacaq, şirkətlərin inkişafına , eləcə də, beynəlxalq investisiyaların və istedadların cəlb olunmasına vəsilə olacaq.
14:23 23.09.2025
Oxunuş sayı: 1080
