Göygöldə Aqrar Biznes Festivalı və II Moruq Festivalı keçirilib
Göygöl rayonunun Keşkü kəndində Aqrar Biznes Festivalı və II Moruq Festivalı keçirilib. Bölgənin aqrar potensialının və aqroturizmin inkişafına dəstək məqsədilə keçirilən bu tədbirlər Göygöl rayon icra hakimiyyətinin və Kənd Təsərrüfatı Nazirliyinin Aqrar İnnovasiya Mərkəzinin təşkilatçılığı, Dövlət Turizm Agentliyi, "AzerGold" Qapalı Səhmdar Cəmiyyəti, Gəncə-Daşkəsən Regional Mədəniyyət İdarəsi, Gəncə-Daşkəsən Regional Məşğulluq Filialı, Kiçik və Orta Biznesin İnkişafı Agentliyinin Gəncə-Qazax Regional Koordinatorluğu, DNK Hospital, “Göygöl Şərab Zavodu” ASC, “Şirin Aqro” QSC, “Prior Leasing” və digər dövlət və özəl qurumların tərəfdaşlığı ilə baş tutub.
Crossmedia.az xəbər verir ki, tədbirin açılış mərasimində çıxış edən Göygöl rayon İcra Hakimiyətinin başçısı Elvin Paşayev bildirib ki, II Moruq Festivalı yerli istehsalçılara öz məhsullarını daha geniş auditoriyaya tanıtmağa, aqroturizmin inkişafı baxımından Göygöl rayonunun imkanlarının nümayişinə imkan verir. O qeyd edib ki, festivalın təşkilində məqsəd bölgənin turizm sektoru üzrə rəqabət qabiliyyətini yüksəltmək, aqroturizmin inkişafına dəstək vermək, Göygöl rayonunun unikal cəhətlərini, burada istehsal olunan kənd təsərrüfatı məhsullarını tanıtmaq, moruq istehsalının təşviqi yolu ilə iqtisadiyyatın inkişafına töhfə verməkdir. İkinci dəfə keçirilən festivala çox böyük marağın olduğunu deyən Elvin Paşayev Göygöl rayonunun ölkəmizdə ən çox giləmeyvə, o cümlədən moruq becərilən rayonlardan biri olduğunu xatırladıb, iştirakçılara və qonaqlara uğurlar diləyib.
Aqrar İnnovasiya Mərkəzinin direktoru Anar Cəfərov bildirib ki, bölgələrdə təşkil olunan məhsul festivalları aqrar sahədə çalışan fermerlər və sahibkarlar üçün öz məhsullarını nümayiş etdirmək, yeni satış kanalları tapmaq və təcrübə mübadiləsi aparmaq üçün gözəl bir platformaya çevrilib. O keçirilən festivalların həm də maarifləndirmə baxımından mühüm əhəmiyyət kəsb etdiyini, festivallar çərçivəsində “Aqrar sahəyə dövlət dəstəyi mexanizmləri” panel müzakirələrin keçirildiyini, kredit yarmarkasının təşkil olunduğunu xatırladıb.
Tədbirin açılış mərasimində çıxış edən digər natiqlər Göygöl rayonunda keçirilən II Moruq Festivalı və Aqrar Biznes Festivalının bölgənin kənd təsərrüfatı və turizm potensialını daha yaxşı formada dəyərləndirmək baxımından əhəmiyyət kəsb etdiyini bildiriblər.
Açılış mərasimindən sonra tədbirin təşkilatçıları festivalda iştirak edən giləmeyvə istehsalçılarının, Aqrar Biznes Festivalına qatılan özəl və dövlət qurumlarının stendləri ilə tanış olublar.
Göygöl rayonunda II Moruq Festivalı ilə yanaşı keçirilən Aqrar Biznes Festivalı da keçirilib. Bu festival kənd təsərrüfatı sahəsində fəaliyyət göstərən müəssisələr, dövlət qurumları və sahibkarların bir araya gəldiyi mühüm platforma sayılır. Göygöl rayonunda keçirilən növbəti Aqrar Biznes Festivalı Festival Kənd Təsərrüfatı Nazirliyinin Aqrar İnnovasiya Mərkəzinin təşkilatçılığı ilə baş tutub və Nazirliyin tabeli qurumları tədbirdə fəal iştirak ediblər.
Festivala qatılan özəl və dövlət qurumları tərəfindən fermerlərə və festival iştirakçılarına aqrar sahədə xidmətlər və dəstək alətləri barədə ətraflı məlumat verilib.
Festival iştirakçılarına həmçinin toxumçuluq, gübrə və pestisid istehsalı, aqrotexnika, suvarma sistemləri sahəsində fəaliyyət göstərən şirkətlər tərəfindən məhsul və xidmətlər təqdim olunub.
Aqrar Biznes Festivalı çərçivəsində təşkil edilən kredit yarmarkasında ölkənin aparıcı bankları və maliyyə institutları iştirak edərək kənd təsərrüfatı sahibkarlarına güzəştli kreditlər, dövlət dəstəyi mexanizmləri və investisiya imkanları barədə ətraflı məlumat veriblər. Fermerlər bank nümayəndələri ilə birbaşa ünsiyyət quraraq yeni maliyyələşmə alətlərindən necə faydalana biləcəkləri barədə praktiki bilgilər əldə ediblər.
Aqrar Biznes Festivalı çərçivəsində “Aqrar sahədə dövlətin dəstək mexanizmləri” mövzusunda panel müzakirələr keçirilib. Müzakirələrdə kənd təsərrüfatında dövlət dəstəyi alətlərinə əlçatanlıq, kredit və sığorta imkanları, məşğulluğun artırılması, qida təhlükəsizliyi standartları və sahibkarların bazara çıxış imkanlarının artırılması istiqamətində fikir mübadiləsi aparılıb.
Qeyd edək ki, Keşkü kəndində təşkil olunan festivallarda ziyarətçilərə moruq istehsalı ilə daha yaxından tanış olmaq imkanı yaradılıb, yerli istehsalçılar tərəfindən təqdim olunan moruq növlərinin dequstasiyası və satışı təşkil edilib. Tədbir çərçivəsində qonaqlar üçün müxtəlif əyləncəli şou proqramlar, ustad dərsləri nümayiş olunub. Ziyarətçilər sənətkarların hazırladıqları əl işləri ilə tanış olmaq, açıq havada konsert proqramını, idmançıların nümunəvi çıxışlarını izləmək imkanı əldə ediblər.
Xatırladaq ki, Göygöl rayonu Azərbaycanda ən çox giləmeyvə becərilən rayonlardan biridir. Son illər rayonda moruq bitkisinin sənaye üsulu ilə becərilməsi həyata keçirilir. Fermerlər moruğun daha məhsuldar olan “Polka” və “Polyana” sortlarını becərməyə üstünlük verirlər. Ötən il Göygöldə 120,5 hektar sahədə giləmeyvə, əsasən moruq və böyürtgən becərilib. Sahələrdən 164,6 ton məhsul yığılıb, orta məhsuldarlıq 14,2 sent/ha olub.
İki gün davam edən festivalları minlərlə qonaq ziyarət edib.
11:20 01.09.2025
Oxunuş sayı: 5667
