Xarici xəbərlər

İspaniyada meşə yanğınları rekord həddə çatdı

İspaniyada bu ilin əvvəlindən bəri baş verən meşə yanğınlarının miqyası son illərin rekord göstəricilərini də üstələyib. Təkcə yanvar–iyul ayları ərzində ölkədə 410 mindən çox hektar ərazi yanıb, bu da ötən ilin göstəricisindən on dəfədən çoxdur.

Crossmedia.az xəbər verir ki, RIA Novosti Avropa Meşə Yanğınları üzrə İnformasiya Sisteminə (EFFIS) istinadla məlumat yayıb. Məlumata görə, ilin əvvəlindən indiyədək İspaniyada ən azı 252 yanğın qeydə alınıb və nəticədə 411 315 hektar torpaq sahəsi külə çevrilib. Yanğınların əsasən ölkənin şimal və qərb bölgələrində baş verdiyi bildirilir.

İspaniya Baş naziri Pedro Sançes vəziyyətin ciddi olaraq qaldığını açıqlayıb. “El Español” qəzeti isə yazır ki, güclü yanğınlar səbəbindən bir neçə bölgədə minlərlə insan təxliyə olunub.

Müqayisə üçün qeyd edək ki, 2024-cü ildə ümumilikdə 219 yanğın baş vermiş və 42 615 hektar sahə zərər görmüşdü. 2023-cü ildə 371 yanğında 91 220 hektar, 2022-ci ildə isə 493 yanğında 306 555 hektar ərazi məhv olmuşdu. Beləliklə, 2025-ci ilin göstəriciləri artıq həm 2023-cü, həm də 2022-ci ilin rekordlarını geridə qoyub.

Nihat Tahirov

🖨 Çap et

12:20 26.08.2025

Oxunuş sayı: 838