100-dən çox humanitar və hüquq müdafiə təşkilatı xəbərdarlıq edir: Qəzzada “kütləvi aclıq” yayılıb
Yayımlanan birgə bəyanatda bildirilir ki, Qəzzaya gündəlik orta hesabla cəmi 28 humanitar yardım yük maşını daxil olur.
Crossmedia.az-ın məlumatına görə, İsrail tərəfi ərzaq tədarükünə mane olmadığını bildirir və qeyd edir ki, bölgəyə 2000 ton uşaq qidası çatdırılıb.
ABŞ rəsmiləri bəyan ediblər ki, onların yüksək səviyyəli elçisi atəşkəs və humanitar dəhlizin yaradılması ilə bağlı danışıqlar aparmaq üçün Avropaya yola düşür.
HƏMAS-ın nəzarətində olan Qəzza Səhiyyə Nazirliyi məlumat verib ki, son sutka ərzində sektorda aclıqdan 10 nəfər ölüb. Tibb işçilərinin məlumatına görə, 2023-cü ilin oktyabrında başlayan münaqişədən bu yana aclıqdan ölənlərin ümumi sayı 111 nəfərə çatıb.
Nazirliyin açıqlamasına əsasən, aclıqdan ölən bütün böyüklər son iki sutka ərzində həyatını itirib.
Qəzza şəhərində yerləşən “Əş-Şifa” xəstəxanasının direktoru doktor Məhəmməd Əbu Səlmi BBC-yə bildirib ki, son üç gün ərzində sektorda 21 uşaq qidalanma çatışmazlığından dünyasını dəyişib. Onun sözlərinə görə, Qəzza zolağında 900 min uşaq aclıq və yetərsiz qidalanma ilə üzləşir.
22:40 24.07.2025
Oxunuş sayı: 1385
