Türkiyə kəşfiyyatı Əhməd əş-Şaraanın həyatını üç dəfə xilas etdib
Suriyanın keçid dövrü prezidenti Əhməd əş-Şaraa son yeddi ayda üç sui-qəsdə məruz qalıb.
Crossmedia.az bildirir ki, İsrailin “Yedioth Ahronoth” qəzeti bu barədə reportaj hazırlayıb. Hücumların ən azı biri Türkiyə təhlükəsizlik qüvvələrinin birbaşa müdaxiləsi nəticəsində uğursuzluqla nəticələnib.
Birinci sui-qəsd cəhdi paytaxt Dəməşqdə yerləşən Qasr əş-Şaab sarayının çıxışında baş verib. Şübhəli fəaliyyətləri müşahidə edən türk təhlükəsizlik qüvvələri dərhal müdaxilə edərək hücum edən şəxsi zərərsizləşdirib. Məqalədə qeyd olunur: “Türklər Şaraanın həyatını xilas etdi”.
İkinci sui-qəsd cəhdi İordaniya ilə sərhəddə yerləşən Dəraa vilayətində baş verib. Əhməd əş-Şaraanın bölgəyə səfəri zamanı, onun karvanının hərəkət marşrutu üzərində iki şübhəli şəxs Suriya və Türkiyə təhlükəsizlik qüvvələri tərəfindən saxlanılıb. Hücum yayındırıcı manevrlə qarşısı alınaraq ictimaiyyətə açıqlama verilmədən ört-basdır edilib.
Üçüncü və ən ciddi sui-qəsd planı Dəməşqdə müəyyən marşrut üzərində silahlı pusqu ilə həyata keçirilməli idi. Lakin bu plan Türkiyə və yerli kəşfiyyat tərəfindən son anda ifşa edilərək qarşısı alınıb. Hadisədən dərhal sonra Şaraanın Dəməşqdən qəfil çıxışı diqqət çəkib.
İsrail və ərəb mediası bildirir ki, Əhməd əş-Şaraa bu hücumlarla bağlı ictimaiyyətə heç bir məlumatın verilməməsi göstərişini verib.
Mehriban Yariyeva
17:30 22.07.2025
Oxunuş sayı: 9692
