Ermənistan daxilində vəziyyət gərgindir: Paşinyan dini xadimlərlə qarşı-qarşıya
Ermənistanın Baş naziri Nikol Paşinyanın Bütün Ermənilərin Katolikosunun vəzifədən kənarlaşdırılmasına dair çağırışları "Daşnaksütyun" partiyası tərəfindən kəskin şəkildə pislənib.
Crossmedia.az xəbər verir ki, bu barədə “Sputnik Armenia” yazıb.
Partiyanın yaydığı bəyanatda bu addımların "ağır və xüsusilə ağır cinayətlərə hazırlıq" olduğu bildirilir.
Qeyd edək ki, bəyanata görə, bu çağırışlar qanunla cəzalandırılan əməllər hesab olunur. Belə ki, zorakılıqla və ya zorakılıq təhlükəsi ilə Katolikosu istefaya məcbur etməyə cəhd, həmçinin kütləvi iğtişaşlar və təxribatların təşkili əlamətləri daşıyır. Partiya hesab edir ki, bu cür addımlar Müqəddəs Eçmiədzin – Ermənistan Apostol Kilsəsinin əsas dini mərkəzinin normal fəaliyyətini pozacaq.
Bu səbəbdən "Daşnaksütyun" partiyası Ermənistan Polisi və Milli Təhlükəsizlik Xidmətini planlaşdırılan qanunsuz hərəkətlərin qarşısını almağa və baş nazirin qanunsuz çağırışlarına şərik olmamağa çağırıb. Eyni zamanda, Baş Prokurorluq və İstintaq orqanlarından Paşinyanın bu bəyanatlarına görə cinayət işi başlanması tələb olunub.
Xumar Emilqızı
23:58 21.07.2025
Oxunuş sayı: 693
