Şuşa Qlobal Media Forumunun bir qrup iştirakçısı Laçın şəhərində olub
İyulun 20-də Şuşa Qlobal Media Forum çərçivəsində keçirilən “AZƏRTAC 105: Əməkdaşlığın keçmişi, bugünu və gələcəyi” mövzusunda dəyirmi masanın qonaqları Şuşadan Laçın şəhərinə gəliblər.
Crossmedia.az xəbər verir ki, qonaqların Laçınla tanışlığı Qarabağın çoxşaxəli nadir yaradıcılıq məkanı layihəsi olan “Hoçazfilm” yaradıcılıq studiyasından başlayıb.
Məlumat verilib ki, studiyanın adı Laçın rayonunun əsas rəmzlərindən sayılan Hoçaz qayalıqlarının adından götürülüb. Studiya film istehsalçılarına bölgənin zəngin təbiəti, imkanları ilə bağlı bələdçilik və lokasiya xidmətləri göstərəcək, onları müvafiq avadanlıqla təmin edəcək.
Forum iştirakçıları pavilyonda quraşdırılmış təyyarə, helikopter, həbsxana, elmi laboratoriya və üçtərəfli yaşıl ekran dekorasiyalarına baxış keçiriblər.
Sonra qonaqlar “Gilabi Ceramics” Yaradıcılıq Mərkəzini ziyarət ediblər. Mərkəzdə istehsal edilən məhsullarda tarix və mədəniyyətimiz - Laçına, ümumiyyətlə Qarabağa aid elementlər təsvir olunur. Qeyd edək ki, burada çalışan rəssamların bir qismi Bakıdan dəvət olunub. Onlar sakinlərə bu sahə üzrə təlim keçirlər.
18:00 20.07.2025
Oxunuş sayı: 762
