“Terrorsuz Türkiyə”də terror təşkilatları varlığını davam etdirə bilməz
Son illərdə Türkiyədə baş verən hadisələr yalnız daxili siyasətə deyil, həm də regional güc balansına təsir edən mühüm dönüş nöqtələrini ortaya qoyur. Terror təşkilatlarının ləğvi, ideoloji mübarizələrin sonlanması və yeni siyasi ittifaqların formalaşması fonunda Türkiyə Cümhuriyyəti “terrorsuz Türkiyə” hədəfinə doğru irəliləyir. Bu proses, həm dövlətin strateji planlaması, həm də regionda imperialist güclərin və müharibələrinin zəifləməsi ilə paralel şəkildə inkişaf edir.
Mövzu ilə bağlı Crossmedia.az-a açıqlama verən politoloq Hasan Oktay ilk olaraq bildirib ki, Türkiyədə mühüm və olduqca maraqlı hadisələr baş verir:
“Bunların başında 40 ildir terror təşkilatları vasitəsilə Türkiyəyə təzyiq göstərməyə çalışan imperialist güclər gəlir. HƏMAS və İsrail arasındakı qarşıdurmalardan sonra, Əsədin devrilib Moskvaya qaçması ilə İran və Rusiyanın regionda qurduğu vəkalət müharibəsi aparan təşkilatlar bir-bir ləğv olunmağa başlayıb. Hizbullahın, Haşdi Şabinin və Yəməndəki Husilərin başına gələnləri nəzərə alaraq demək olar ki, Sovetlər tərəfindən qurulan və sonra BƏƏS rejiminin təsiri altında Türkiyəyə qarşı mübarizə aparan PKK-nın da sonu gəlib. BƏƏS rejimi devrildikdən sonra PKK özünü məcburən ləğv etməyə məcbur qaldı. Təşkilat bunu ideoloji və təşkilati bir uğur kimi təqdim etməyə çalışsa da, fakt odur ki, Türkiyə Cümhuriyyəti “terrorsuz Türkiyə” şüarı ilə PKK-nın silah buraxma mərhələsinə yaxından izləyir. Bugün Prezident Ərdoğan, partiyasının Cümhur İttifaqının bir üzvü olaraq bundan sonrakı prosesdə rəsmi şəkildə sistemə daxil olacağını açıqlayıb. Bu gözlənilən bir proses idi. Bunu üç ay əvvəl Ramazan bayramından sonra partiyaların bayramlaşma mərasimləri çərçivəsində MHP-nin bayramlaşma toplantısı ilə bağlı Şimali İraqda yayımlanan Ruda TV-yə verdiyim müsahibədə bunu açıq şəkildə demişdim. Bunun ardınca Türkiyədə tanınmış YouTuber və televiziya prodüseri Ardan Zentürk bizim söylədiklərimizə istinad edərək həm təəccübünü bildirib, həm də bu hadisələrin gerçəkləşməsi halında Türkiyənin hansı mərhələyə keçəcəyinə dair narahatlıqlarını açıqlayıb”.
H.Oktayın sözlərinə görə, sözügedən partiya— DEM Partiyası, Milliyyətçi Hərəkat Partiyasının yaratdığı Cümhur İttifaqına rəsmi şəkildə qoşulub:
Təbii ki, bu addımın silahları buraxma mərasimi ardından baş verməsi, qarşılıqlı addım atma prosesini gündəmə gətirir. Təşkilat hansı addımı atacaq və dövlət buna qarşı necə cavab verəcək — bu mövzular müzakirə ediləcək. Hökumətin əsas gözləntisi isə 400 millət vəkili sayına çatmaq və ölkə konstitusiyasını dəyişdirərək Ərdoğanın ömürlük prezident seçilməsini təmin etməkdir. Təşkilat da öz növbəsində Abdullah Öcalan və digər PKK məhkumlarının azadlığa buraxılmasını tələb edəcək. Beləliklə, tərəflər qarşılıqlı atılan addımlara uyğun yeni mərhələyə qədəm qoyacaqlar. Təəssüf ki, media bu prosesləri ya düzgün oxuya bilmir, ya da səthi yanaşma ilə xalqa çatdırır. Son günlərdə ABŞ-nin Suriya üzrə xüsusi nümayəndəsi və Türkiyə səfiri mediaya verdikləri açıqlamalarda Jak Barakın “Osmanlı modeli” istədiyi ifadəsi əsasında onun missiyasını və bəyanatlarını tənqid etməyə çalışdılar. Lakin sonradan məlum oldu ki, Jak Barak Atatürk tərəfindən qurulan müasir Türkiyə sistemini İran, İraq, Suriya, Livan və İsrail daxil olmaqla Orta Şərq üçün nümunəvi model olaraq təqdim etməyə başlayıb. Beləliklə, Türkiyə modeli Orta Şərqdə işlədiyi halda, PKK vasitəsilə Türkiyəyə başqa sistem ixrac etmək cəhdləri tamamilə aradan qalxıb. Türkiyə regionda mühüm gücdür: dünyanın 17-ci böyük iqtisadiyyatına, NATO-nun ikinci ən güclü ordusuna sahibdir və 200 illik qərbləşmə prosesini tamamlamış, hüquq, insan haqları və bərabərliyə əsaslanan çağdaş bir vətəndaşlıq modeli yaratmışdır. Artıq bu sistemin xarici müdaxilələrlə dəyişdirilməsi deyil, ətrafına nümunə olması dönəmi başlayıb. Bu səbəbdən, “terrorsuz Türkiyə” məqsədi çərçivəsində BƏƏS rejimi dağıldıqdan sonra marksist mənşəli bir terror təşkilatının varlığını davam etdirməsi mümkün deyil. Abdullah Öcalan da bunu həm yazılı bəyanatında, həm də video çıxışında açıq şəkildə ifadə edib. Bu proseslə PKK tamamilə ləğv ediləcək, lakin Türkiyədə bərabər vətəndaşlıq hissi tam yerinə oturana qədər demokratikləşmə mübarizəsi davam edəcək. Türkiyədə nəzəri olaraq demokratik bir infrastruktur mövcuddur. Praktik tətbiqlərdə zaman-zaman problemlər olsa da, bu heç bir azlığın və ya dini inanca sahib insanların kənarlaşdırılması deyil — bu daha çox sistemin işləmə çətinliklərindən qaynaqlanır. Bu qüsurlar aradan qaldırıldıqda, Türkiyə Cümhuriyyəti vətəndaşı olan hər bir fərdin qanunlar qarşısında tam bərabər olduğu daha hər kəs tərəfindən qəbul ediləcək. Marksist mənşəli terror təşkilatının silah buraxma prosesi çətin və ağrılı ola bilər. Qurulmuş dövlətin və təşkilatın prosesə baxışı fərqli olduğundan, zaman-zaman “yol qəzaları” yaşana bilər, lakin nəticədə PKK silahı buraxmış olur. Türkiyə vətəndaşı olan hər bir fərd hüquqi və vətəndaşlıq haqlarını mənimsəyərək yaşayacaq və bu yaşam formasını iradə ilə dəstəkləyəcək. Cümhur İttifaqına yeni partiyanın qatılması, Milliyyətçi Hərəkat Partiyası seçiciləri üzərində necə təsir yaradacaq — bu da olduqca vacib sualdır. Son parlament və prezident seçkilərində Cümhur İttifaqı, CHP-nin qeyri-rəsmi ittifaqlarla terror təşkilatları ilə əməkdaşlıq etdiyi təbliğatı hələ də yaddaşlardan silinməyib. İndi müxalifət, Cümhur İttifaqını da terrorla əməkdaşlıqda suçlayacaq. Ancaq bu siyasi şüarları bir kənara qoyub yeni “terrorsuz Türkiyə”ni qurmaq və onu haqlı yerinə aparmaq lazımdır. Burada MHP seçiciləri ilə yeni partiyanın seçicilərinin uyğunlaşma prosesi də olduqca vacib olacaq. Gələcəkdə Ərdoğandan sonra AK Partinin davamlılığı təmin olunmadığı təqdirdə, Türk milliyyətçiliyinin daha geniş miqyasda Türkiyənin problemlərinə sahib çıxması ilə qurumsal bir kimlik olaraq ölkəni idarə etmə şansı yaranacaq. Bu səbəbdən yeni partiyanın PKK ilə bağlı addımı Türk milliyyətçilərini parçalamaq deyil, daha bilinçli, daha əhatəli, Türkiyənin problemlərinə həll təklif edən ideyalarla iqtidara namizəd olma prosesini başlatacaq”.
Nəzrin Salmanova
10:29 13.07.2025
Oxunuş sayı: 1210
