"Media haqqında" Qanun dəyişir: Əsas tələb fərqli olacaq
Müasir informasiya dövründə saxta xəbərlərin sürətlə yayılması və ictimai rəyə təsir imkanlarının artması medianın etibarlılığı və peşəkarlığı məsələsini daha da ön plana çıxarır. Azərbaycanda bu çağırışlara cavab olaraq, media sahəsində yeni hüquqi normaların tətbiqi istiqamətində mühüm addımlar atılır. Son dövrlərdə "Media haqqında" Qanuna təklif olunan dəyişikliklər də məhz informasiya mühitinin sağlamlaşdırılması, saxta və mənbəyi bilinməyən məlumatların yayılmasının qarşısının alınması, eləcə də media subyektlərinin hüquqi və etik məsuliyyətinin artırılması məqsədi daşıyır. Bu dəyişikliklər cəmiyyətin artan informasiya təhlükəsizliyi tələblərini nəzərə almaqla, ölkədə daha şəffaf, məsuliyyətli və peşəkar media mühitinin formalaşmasına zəmin yaradır.
Milli Məclis də Azərbaycan mediasında saxta məlumatların dərc edilməsinə yol verilməməsinə dair yeni normalar müəyyənləşdirir.
Professor Qulu Məhərrəmli bu normalarla bağlı fikirlərini Crossmedia.az-la bölüşüb: "Bu gün biz faktiki olaraq saxta məlumatların yayıldığı bir şəraitdə yaşayırıq. Müxtəlif məqsədlərlə müxtəlif məlumatlar yayılır. Bunların hamısı gerçək jurnalistikanın prinsiplərinə ziddir. Ona görə bunların qanunla tənzimlənməsinə ciddi ehtiyac var. İki-üç il bundan əvvəl “Media haqqında” Qanun qəbul edildi. Çox təəssüf edirəm ki, o qanun bir az tələsik şəkildə qəbul olundu və orada bu nüanslar buraxıldı. Ona görə də “Media haqqında” Qanuna əlavə - dəyişikliklərin olunmasına ehtiyac yaranıb və informasiyaya verilən tələblər sırasında yeni maddələrin əlavə edilməsinə zərurət yaranıb. Bunu çox normal hesab edirəm. Mənə elə gəlir ki, burada xüsusi olaraq informasiya agentliklərinin rolu qabardılır. Təklif edilən layihədə belə bir müddəa irəli sürülür ki, informasiya agentliklərinin verdiyi məlumatların 80%-i özləri tərəfindən hazırlanmalıdır. Birbaşa mənbələrdən alınmalı və o şəkildə yayılmalıdır. Təbii ki, şərtlərin sırasında Azərbaycan üçün strateji əhəmiyyəti olan ölkələrdə informasiya agentliklərinin müxbir məntəqələrinin olması, xarici ölkə agentlikləri ilə əməkdaşlıq müqaviləsinin olması da var. Bunların hamısı məlumatın dəqiq olması məqsədi daşıyır".
Ayhan
17:01 02.07.2025
Oxunuş sayı: 4857
