Almaniya gəncləri orduya cəlb etmək üçün TikTok-u işə salır
Avropanın ən güclü ənənəvi ordusuna sahib olmağı hədəfləyən Almaniya, gəncləri hərbi xidmətə təşviq etmək üçün sosial şəbəkələrdən, xüsusilə TikTok-dan istifadə etməyə başlayıb.
Crossmedia.az Almaniya mətbuatına istinadən xəbər verir ki, zorunlu hərbi xidmətin olmadığı Almaniyada hökumət, gənclər arasında orduya marağı artırmaq üçün “TikTok ulduzu” Coşua Krebsin dəstəyindən faydalanır. “Sinematik çavuş” ləqəbi ilə tanınan Krebs, texno musiqi fonunda hərbi həyatı əks etdirən videoları Almaniya ordusunun rəsmi razılığı ilə yayımlayır.
Krebsin videolarında tankların hərəkəti, kazarmalardan görüntülər və əsgərlərin gündəlik həyatı yer alır. O, bu ilin əvvəlində NATO-nun baş katibi Mark Rutte ilə də qısa bir video müsahibə aparıb. Krebs, həmçinin “Alman Ordusunun İçindən” adlı kitabın müəllifidir.
Almaniya ötən həftə NATO sammitində 2035-ci ilə qədər müdafiə xərclərini ÜDM-in 5%-nə çatdırmağı öhdəsinə götürüb. Lakin əsas sual hələ də açıq qalır: alınan silahları kim idarə edəcək?
Müdafiə naziri Boris Pistorius, hazırda 180 minlik ordunun 50-60 min əsgərlə gücləndirilməli olduğunu bildirib. Məcburi hərbi xidmətə qayıdış təklifi gündəmdə olsa da, Pistorius “könüllü xidmət” modelini təklif edir. Bu modelə əsasən, 18 yaşı tamam olmuş gənclərə sorğu göndəriləcək, seçilənlər müayinəyə çağırılacaq və uyğunsuzluq yoxdursa, xidmətə cəlb ediləcəklər.
Kansler Fridrix Mers isə Almaniyanı Fransanı geridə qoyaraq Avropanın ən güclü ordusu halına gətirməyi qarşıya məqsəd qoyub. Müdafiə xərclərinin 2029-cu ildə 153 milyard avroya çatdırılması planlaşdırılır.
Mədinə Cəlilova
15:50 29.06.2025
Oxunuş sayı: 658
