Süni intellekt dövründə rəqəmsal görünürlüğü orijinal məzmun və etibar müəyyən edir
Süni intellekt texnologiyaları və bu texnologiyalarla işləyən axtarış sistemləri rəqəmsal görünürlük qaydalarını dəyişir. Mütəxəssislərin fikrincə, yeni dövrdə brendlərin önə çıxması üçün etibarlı, orijinal və yoxlanıla bilən məzmunun hazırlanması daha böyük əhəmiyyət daşıyır.
Crossmedia.az xəbər verir ki, bu barədə “GEO: Generative Engine Optimization” adlı tədqiqatda qeyd olunub.
Prinston Universiteti və tərəfdaş qurumlar tərəfindən yayımlanan araşdırmaya əsasən, rəqəmsal mühit ənənəvi klik yönümlü modeldən süni intellektin mənbələrə istinad etdiyi yeni sistemə keçir.
Süni intellekt köməkçilərinin internetdə axtarış vərdişlərini dəyişdirdiyi hazırkı mərhələdə axtarış nəticələrində görünmək üçün şəffaf və dürüst rəqəmsal məzmun yaratmaq vacib sayılır.
Sahədə generativ axtarış sistemlərinin optimallaşdırılması (GEO) adlandırılan yeni yanaşma alqoritmlərin orijinal məlumatları ön plana çıxarmasına əsaslanır.
Tədqiqatçılar ChatGPT, Perplexity və Google AI Overviews kimi generativ axtarış sistemlərinin məlumatları necə emal etdiyini araşdırmaq üçün 10 mindən çox sorğudan ibarət “GEO-bench” adlı test bazası hazırlayıblar.
Optimallaşdırma sınaqları göstərib ki, yoxlanıla bilən statistik məlumatlar təqdim edən, mənbələrə istinad edən və mütəxəssis rəylərini əhatə edən məzmunlar süni intellektin cavablarında görünürlüğü 40 faizə qədər artıra bilir.
İstifadəçilərin ənənəvi keçidlərə daxil olmaq əvəzinə süni intellektin ümumiləşdirdiyi cavablara üstünlük verməsi rəqəmsal marketinq strategiyalarına da təsir göstərir. Türkiyədə də bu sahədə fəaliyyətin yeni tendensiyaya uyğunlaşdığı bildirilir.
Mütəxəssislər hesab edirlər ki, süni intellekt sistemlərinin etibarlılıq və nüfuz meyarları brendlərin rəqəmsal strategiyalarının əsas istiqamətlərindən birinə çevrilir. Bu dəyişiklik qlobal rəqəmsal bazarda büdcə rəqabətini zəiflədərək keyfiyyətli və orijinal məlumat hazırlayanların üstünlük qazanmasına şərait yarada bilər.
04:44 14.10.2026
Oxunuş sayı: 55
