İsrail qüvvələri İordan çayının qərb sahilində fələstinlilərə hücum etdi: Üç nəfər yaralanıb
İsrailin işğal altındakı İordan çayının qərb sahilində fələstinlilərə qarşı hücumları davam edir. Son məlumata görə, İsrail ordusunun hücumlarında biri 85 yaşlı olmaqla üç fələstinli yaralanıb. Bununla yanaşı, qeyri-qanuni israilli məskunlaşanların fələstinlilərə qarşı zorakılıq aktlarında da 30 faizlik artım qeydə alınıb.
Crossmedia.az xəbər verir ki, Fələstin hökumətinə bağlı Duvar və Məskunlaşmaya Qarşı Müqavimət Komissiyasının fəalı Usamə Muhamera Anadolu Agentliyinə açıqlamasında bildirib ki, İsrail ordusu səhər saatlarında Əl-Xəlil şəhərinin cənubunda yerləşən Məsəfir Yətta bölgəsinin Həllə Dabi kəndinə basqın təşkil edib.
Muhamera İsrail əsgərlərinin basqın zamanı aralarında qadınlar, uşaqlar və yaşlıların da olduğu kənd sakinlərini döydüyünü, yaşlı bir fələstinlinin bədənində ciddi göyərmələr yarandığını və huşunu itirdiyini deyib. Həmin şəxs xəstəxanaya çatdırılıb. Muhamera əlavə edib ki, İsrail Həllə Dabi kəndinin sakinlərini zorla köçürmək üçün müxtəlif təzyiq üsullarına əl atır.
Fələstin Qırmızı Aypara Cəmiyyətindən verilən açıqlamada da Məsəfir Yətta bölgəsində İsrail əsgərlərinin hücumuna məruz qalan 85 yaşlı fələstinlinin xəstəxanaya yerləşdirildiyi bildirilib.
Bundan əlavə, Əl-Xəlilin cənubunda yerləşən Meytar nəzarət-buraxılış məntəqəsi yaxınlığında İsrail əsgərlərinin açdığı atəş nəticəsində bir fələstinlinin yaralandığı qeyd olunub.
İordan çayının qərb sahilinin şimalındakı Cenin şəhərində isə İsrail əsgərləri tərəfindən döyülən 43 yaşlı bir fələstinli Celeme hərbi keçid məntəqəsi yaxınlığında yaralanaraq xəstəxanaya aparılıb.
İşğal altındakı İordan çayının qərb sahilində fələstinli torpaqlarını ələ keçirən israillilərin 2025-ci ilin əvvəlindən bu yana həyata keçirdikləri hücumlarda 30 faizlik artım müşahidə olunub.
İsrail Ordu Radiosunun xəbərinə görə, Təl-Əvivdəki təhlükəsizlik qurumlarının məlumatlarına əsasən, 2024-cü il ərzində qərb sahildə yəhudilər tərəfindən törədilən “milli motivli cinayətlərin” sayı 679-a çatıb.
Bu cinayətlərə evlərin yandırılması, irqçi ifadələr, daşla hücumlar və fiziki zorakılıq kimi müxtəlif hadisələr daxildir.
Xəbərdə qeyd olunur ki, 2024-cü ilin ilk yarısında 318 hücum qeydə alınıbsa, 2025-ci ilin eyni dövründə bu rəqəm 414-ə yüksəlib. Bu da ötən ilin eyni dövrü ilə müqayisədə 30 faiz artım deməkdir.
İsrail ordusundan yüksək rütbəli bir zabit hücumların təkcə say baxımından deyil, eyni zamanda şiddət baxımından da artdığını vurğulayaraq “Hadisələr getdikcə daha təhlükəli xarakter alır” deyib.
Bu inkişaflar İsrail ordusu və israilli məskunlaşanların qərb sahildəki hücumlarını artırdığı bir vaxta təsadüf edir. Bu hücumlar Qəzzada davam edən soyqırımla eyni vaxtda baş verir.
Fələstinli mənbələrə görə, 7 oktyabr 2023-cü ildən bu yana İordan çayının qərb sahilində azı min fələstinli öldürülüb, təxminən 7 min nəfər yaralanıb.
Mədinə Cəlilova
14:10 29.06.2025
Oxunuş sayı: 474
