Deputat Rusiyada soydaşlarımıza hücumdan hiddətləndi: “Bu məsələdə əli olan cinayətkarlar mütləq məsuliyyətə cəlb olunmalıdır”
İyunun 27-də Rusiyanın Yekaterinburq şəhərində, Rusiya hüquq mühafizə orqanları tərəfindən azərbaycanlılara qarşı həyata keçirilən qətl və həbslər cəmiyyətdə narahatlıq doğurub. Hüquq mühafizə orqanlarının əməkdaşları azərbaycanlıların evlərinə girib, soydaşlarımıza işkəncələr verib və qətllər törədiblər. Bu məsələ ikitərəfli münasibətlərdə ciddi böhrana səbəb olmaqdadır.
Bu barədə Crossmedia.az-a danışan Milli Məclisin deputatı Vüqar İskəndərov qeyd edib ki, bu qəddar hadisə azərbaycanlıları hiddətləndirib: “Əvvəla, burada nasizm əlamətləri var: insanlara qarşı qəddar rəftar, sorğu-sualsız qətllər, evlərə basqın, günahsız insanların həbsi. Bu, mütləq Rusiya federal rəhbərliyi tərəfindən nəzarətə götürülməli və araşdırılmalıdır. Artıq bununla bağlı Azərbaycan Xarici İşlər Nazirliyi Rusiyaya nota verib və müvəqqəti işlər vəkili nazirliyə dəvət olunub, ondan izahat istənilib. Təbii olaraq, Azərbaycan tərəfi öz iradını Rusiyaya çatdırıb. Düşünürəm ki, artıq bu məsələ aydınlaşdırılmalıdır. Bu amansız rəftarlar, insanlığa sığmayan hərəkətlər mütləq araşdırılmalı, bu məsələdə əli olan cinayətkarlar mütləq cinayət məsuliyyətinə cəlb olunmalıdır. Təəssüflər olsun ki, Rusiyada baş verən bu hadisə ilk deyil. Rusiyada qeyri-millətlərə qarşı hər zaman bu cür davranışlar olub”.
Ayhan
21:21 28.06.2025
Oxunuş sayı: 5849
