Xarici xəbərlər

İsrailin Qəzzaya hücumu nəticəsində 43 fələstinli həlak olub

İsrailin Qəzza zolağında müxtəlif bölgələrə endirdiyi artilleriya zərbələri nəticəsində aralarında qadın və uşaqların da olduğu 43 fələstinli həyatını itirib.

Crossmedia.az xəbər verir ki, Qəzzadakı xəstəxana mənbələrinin məlumatına görə, İsrail ordusu ötən gecədən etibarən Qəzzanın şimal, mərkəz və cənub hissələrinə intensiv hücumlar təşkil edib.

Qəzza şəhərinin şimal-qərbində yerləşən Adnan əl-Alimi məktəbinə endirilən hücum nəticəsində 2 nəfər ölüb, bir çox insan yaralanıb. Xan Yunisin əl-Məvasi bölgəsində məcburi köçkünlərin sığındığı çadıra hücum zamanı isə 6 nəfər həyatını itirib. Ölənlər arasında eyni ailədən olan 3 qardaşın da olduğu bildirilib.

Rəfah şəhərinin qərbində yerləşən və ABŞ-İsrailin rəhbərlik etdiyi “Qəzzaya Humanitar Yardım Vəqfi”nin yardım paylama məntəqələrindən birində mülki şəxslərə açılan atəş nəticəsində 6 nəfər həyatını itirib.

Qəzzanın Tuffah məhəlləsində yerləşən Yaffa bazarına təşkil edilən hava hücumunda isə aralarında daun sindromlu bir qız, qadınlar və yaşlıların da olduğu 11 fələstinli həlak olub.

Qeyd edək ki, İsrailin son hücumları nəticəsində Qəzzada humanitar vəziyyət daha da ağırlaşıb.

Aybəniz Səfərova

🖨 Çap et

18:42 28.06.2025

Oxunuş sayı: 1015