Avropa İttifaqında İsrail böhranı: İspaniya rəsmi şəkildə tələb etdi
İspaniya hökuməti Avropa İttifaqından İsraillə imzalanmış Ortaqlıq Sazişinin dayandırılmasını tələb edib. Bu tələb İsraillə İspaniya arasında diplomatik gərginliyə səbəb olub.
Crossmedia.az xarici KİV-ə istinadən xəbər verir ki, Aİ Şurasının Brüsseldə keçirilən iclasında İspaniya Baş naziri Pedro Sançes digər üzv ölkələrin liderlərinə AB–İsrail Ortaqlıq Sazişinin dayandırılması ilə bağlı çağırış edib. Bunun ardından İsrailin Madriddəki səfirliyi yazılı açıqlama yayaraq bu çağırışı “əxlaqi cəhətdən müdafiəolunmaz” adlandırıb.
İsrailin İspaniyadakı səfirliyi bildirib ki, Madridin bu mövqeyi İspaniyanı “tarixin səhv tərəfində” yerləşdirəcək və bu yanaşma ölkəni Avropanın Yaxın Şərq siyasətində təcrid olunmuş bir vəziyyətə salacaq.
İspaniya Xarici İşlər Nazirliyi isə bu açıqlamaya sərt reaksiya verib və İsrailin Madriddəki müvəqqəti işlər vəkili Dan Porazı nazirliyə çağırıb. Nazirlik səfirliyin İspaniya hökumətinə qarşı ifadələrinin qəbuledilməz olduğunu bəyan edib.
İspaniya Xarici İşlər naziri Xose Manuel Albares iyunun 23-də keçirilən Aİ Xarici İşlər Nazirləri Toplantısında həmkarlarına İsraillə Ortaqlıq Sazişinin dərhal dayandırılması, silah embarqosu tətbiqi və İsrailli rəsmilərə qarşı fərdi sanksiyalar qoyulması çağırışını edib.
Qeyd edək ki, İsrail İspaniyanın 2024-cü ilin mayında Fələstin dövlətini rəsmi tanımasından sonra Madriddəki səfirini geri çağırıb və bu ölkə ilə münasibətləri hal-hazırda müvəqqəti işlər vəkili səviyyəsində davam etdirir.
Mədinə Cəlilova
04:00 28.06.2025
Oxunuş sayı: 8064
