Fələstinə dəstək üçün İngiltərədə hərbi təyyarələri qırmızıya boyayan fəallar saxlanılıb
İngiltərədə iki hərbi təyyarənin “Fələstinlilərin axıdılan qanını” simvolizə edən qırmızı boya ilə boyanması ilə bağlı keçirilən aksiyaya görə dörd nəfər saxlanılıb.
Crossmedia.az İngiltərə mətbuatına istinadən xəbır verir ki, polisin açıqlamasına görə, 29 yaşlı bir qadın və 36 ilə 24 yaşlı iki kişi “terror aktının törədilməsi, planlaşdırılması və ya təhriki” şübhəsi ilə, 41 yaşlı bir qadın isə “cinayətkara yardım” ittihamı ilə saxlanılıb.
“Palestine Action” adlı fəal qrupun üzvləri 20 iyun tarixində İngiltərənin RAF Brize Norton hava bazasına daxil olaraq, iki “Airbus Voyager” tipli hərbi təyyarəni yanğınsöndürmə balonlarına doldurduqları qırmızı boya ilə boyayıblar. Onlar qırmızı rəngi Fələstinlilərin axıdılan qanı kimi təqdim ediblər.
Hadisədən sonra İngiltərə hökuməti sözügedən qrupun fəaliyyətini “terrorla mübarizə qanunları” çərçivəsində qadağan etmək niyyətində olduğunu açıqlayıb. Daxili İşlər Naziri Yvette Cooper isə bu aksiyaların aqressivləşdiyini və milyonlarla funt sterlinq dəyərində zərərə səbəb olduğunu bildirib.
Qrupun bəyanatına əsasən, təyyarələr hər gün RAF Akrotiri (Cənubi Kipr) bazasına uçur və bu baza İsrailin Qəzzadakı hərbi əməliyyatları üçün istifadə olunur. Fəallar, təyyarələri sıradan çıxarmaqla İngiltərənin Yaxın Şərqdəki hərbi fəaliyyətlərinə müdaxilə etdiklərini bəyan ediblər.
Mədinə Cəlilova
03:00 28.06.2025
Oxunuş sayı: 555
