HƏMAS: İsrailin payladığı un kisələrində narkotik həblər aşkarlanıb
Qəzzadakı Hökumətin Media Ofisi açıqlayıb ki, ABŞ və İsrailin nəzarətində fəaliyyət göstərən “Qəzza Humanitar Yardım Fondu” vasitəsilə yaradılan yardım mərkəzlərində paylanan un kisələrinin içərisində narkotik tərkibli Oksikodon həbləri tapılıb.
Crossmedia.az xarici mediaya istinadən xəbər verir ki, yazılı açıqlamaya görə, dörd nəfər ABŞ-İsrail yardım mərkəzlərindən əldə edilən un kisələrində Oksikodon tipli narkotik maddə aşkarlayıb. Hadisə “mülki vətəndaşların sağlamlığına və cəmiyyətin toxumasına yönəlmiş iyrənc bir cinayət” kimi qiymətləndirilib.
Media Ofisinin məlumatına görə, daha təhlükəlisi isə bəzi narkotik maddələrin unun içinə üyüdülərək qarışdırılması ehtimalıdır. Açıqlamada İsrailin bu vasitə ilə narkotikləri humanitar yardım adı altında Qəzzaya ötürərək Fələstin cəmiyyətində asılılığı yaymağa çalışdığı vurğulanıb.
Həmas bu cür maddələrin “çirkli müharibədə yumşaq vasitə” kimi istifadəsini həm müharibə cinayəti, həm də beynəlxalq humanitar hüququn açıq-aşkar pozuntusu adlandırıb.
Qəzza əhalisinə bu yardım mərkəzlərinə qarşı ehtiyatlı olmaları, paylanan qida məhsullarını diqqətlə yoxlamaları və şübhəli halları dərhal aidiyyəti qurumlara bildirmələri tövsiyə olunub. Eyni zamanda ailələrə çağırış edilib ki, uşaqlarını bu mərkəzlərə getməmək barədə məlumatlandırsınlar və narkotik maddələrin yaratdığı təhlükələr haqqında maarifləndirsinlər.
Mədinə Cəlilova
01:00 28.06.2025
Oxunuş sayı: 7360
