35 min ukraynalı uşaq itkin düşüb: “Rus hərbi düşərgələrinə aparılıblar”
Ukraynadan zorla aparıldığı bildirilən minlərlə uşağın taleyi hələ də naməlum olaraq qalır. Araşdırmalara görə, təxminən 35 min uşaq Rusiya ərazisində və ya onun nəzarətində olan işğal bölgələrində saxlanılır.
Rusiya ordusunun Ukraynaya təcavüzü zamanı uşaqlar ya döyüş bölgələrindən, ya da uşaq evlərindən və ailələrindən alınıb. ABŞ-li ekspertlərin qiymətləndirməsinə görə, bu uşaqlardan yalnız 1366-sı Ukraynaya qaytarıla bilib.
Crossmedia.az xəbər verir ki, İngiltərənin “The Guardian” qəzetinə danışan ukraynalı ana Nataliya, iki oğlunu Rusiyadakı Anapa şəhərində yerləşən düşərgədən xilas etmək üçün həftələrlə sərt və təhlükəli bir yol keçdiyini bildirib. Oğulları “tətil düşərgəsi” adı altında Rusiyaya aparılıb, lakin geri qaytarılmalarına icazə verilməyib. Nataliya saxta sənədlərlə sərhədi keçərək övladlarına çatmağı bacarıb. “Onlar mənim hər şeyimdir. Yenidən qovuşduğumuz anı sözlə ifadə edə bilmərəm”, – deyə o bildirib.
Yale Universitetinin İnsani Araşdırmalar Laboratoriyasının hesabatında bildirilir ki, Rusiyada bu uşaqlar hərbi təlim düşərgələrinə yerləşdirilir, bir qismi isə rus ailələrinə övladlığa verilir. Peyk görüntüləri, sənədlər və ailə ifadələri ilə minlərlə uşağın kimliyi müəyyən edilib.
Qurtarılan uşaqların ifadələrinə görə, düşərgələrdə rus marşları oxutdurulub, Ukraynaca danışmaq qadağan edilib. 9 yaşlı bir uşaq “Bizdən üçrəngli Rusiya bayrağı çəkməyimizi istəyirdilər”,- deyə danışıb.
Yale Universitetindən Nathaniel Raymond bu prosesi İkinci Dünya Müharibəsində nasist Almaniyasının polyak uşaqları almanlaşdırma siyasəti ilə müqayisə edərək, “Bu, müharibə dövründə İkinci Dünya Müharibəsindən bəri qeydə alınan ən böyük uşaq qaçırma hadisəsi ola bilər”, – deyə bildirib.
Ukraynalı uşaq hüquqları müdafiəçiləri Rusiyadakı evlatlığa götürmə sistemindən ciddi narahatlıq ifadə edirlər. Yeni qanunlara əsasən, Ukrayna uşaqlarının rus ailələrinə verilməsi artıq hüquqi cəhətdən mümkün sayılır.
Mədinə Cəlilova
00:00 28.06.2025
Oxunuş sayı: 574
