İsrailli əsgərlər etiraf etdi: Yardım gözləyən fələstinlilərə atəş açmaq əmri verilib
İsrail əsgərləri və ordu əməkdaşları Qəzza zolağında yardım nöqtələrində toplaşan fələstinlilərə qarşı edilən hücumların arxa planını İsrail mediasına açıqlayıblar.
Crossmedia.az xəbər verir ki, “Haaretz” qəzetinə danışan əsgərlər bildiriblər ki, komandanlıq tərəfindən heç bir təhlükə olmadığı halda belə, silahsız insanlara atəş açmaq əmri verilib.
Əsgərlərin sözlərinə görə, son bir ayda yardım bölgələrinin yaxınlığında toplanan fələstinlilərə qarşı məqsədli şəkildə atəş açılıb. Qəzzadakı Səhiyyə Nazirliyi bildirib ki, 27 maydan bu yana yardım mərkəzləri və BMT-nin yardım nöqtələri yaxınlığında 549 nəfər həlak olub, 4 mindən çox insan yaralanıb.
İsrailli əsgərlər qeyd ediblər ki, onlara verilən əmrlər arasında “təhlükə olmasa belə insanları dağıtmaq üçün atəş açmaq” da olub. Əsgərlərdən biri bu vəziyyəti “İsrail ordusunun Qəzzada etik standartlarının tamamilə çökməsi” kimi xarakterizə edib.
Hesabatda bildirilir ki, İsrailin Qəzzada yerləşən yardım bölgələri hər gün səhərlər yalnız bir saat fəaliyyət göstərir. Bu müddət ərzində və mərkəzlərin bağlanmasından əvvəl və sonra İsrail ordusu insanların yaxınlaşmasının qarşısını almaq üçün birbaşa atəşə əl atır.
Əsgərlərin sözlərinə görə, bölgədə nə gözyaşardıcı qazdan, nə də digər dağıdıcı olmayan vasitələrdən istifadə edilir. Yalnız ağır silahlar, pulemyotlar, qumbaralar və minaatanlardan istifadə olunur. Əsgərlər bu əməliyyatlara “Duzlanmış balıq əməliyyatı” adının verildiyini deyiblər.
İsrail ordusunun keçmiş və hazırda xidmət edən bir sıra əməkdaşları Haaretz-ə bildiriblər ki, bu əməllər nəticəsində bölgədə insan həyatı artıq əhəmiyyət daşımır və ölüm halları “adi hal” kimi qarşılanır. Onların sözlərinə görə, ordunun Qəzzadakı yanaşması “qaydaların olmadığı, məsuliyyətin hiss olunmadığı” bir rejimə çevrilib.
Mədinə Cəlilova
23:45 27.06.2025
Oxunuş sayı: 9650
