Almaniya Federal Məclisindən ailə birləşməsi ilə bağlı mühüm qərar
Almaniya Federal Məclisi “ikincili qoruma” statusuna malik sığınmacıların ailə birləşməsi hüququnun 2 il müddətinə dayandırılmasını nəzərdə tutan qanun layihəsini qəbul edib.
Crossmedia.az Almaniya mətbuatına istinadən xəbər verir ki, qəbul edilən yeni qanuna əsasən, Cenevrə Konvensiyası çərçivəsində rəsmi qaçqın statusu verilməyən, lakin mənşə ölkələrinə geri göndərildikləri halda ciddi təhlükə ilə üzləşə biləcəkləri ehtimal olunan və “ikincili qoruma” verilən şəxslərin ailə üzvlərinin Almaniyaya gəlməsi müvəqqəti olaraq dayandırılacaq.
Qanun layihəsi Federal Məclisdə keçirilən səsvermədə 444 lehinə, 135 əleyhinə səslə qəbul olunub.
Almaniyanın daxili işlər naziri Aleksander Dobrindt parlamentdə çıxışı zamanı bildirib ki, bu addım ölkədə miqrasiya nəticəsində dövlət və cəmiyyət üzərində yaranan yüklənmənin qarşısını almağa xidmət edir: “Alman sosial sistemi, təhsil strukturu və mənzil bazarının davamlılığı müəyyən həddə qədərdir”.
Dobrindt qeyd edib ki, bu qərar nəticəsində ildə təxminən 12 min nəfərin ölkəyə gəlməsinin qarşısı alınacaq.
Yeni qanunun xüsusilə Suriyadan gələn sığınmacılara təsir edəcəyi vurğulanır. 2024-cü ilin sonuna olan məlumata görə, Almaniyada “ikincili qoruma” statusu ilə yaşayan təxminən 390 min sığınmacıdan 296 mini suriyalılardır.
Mədinə Cəlilova
23:35 27.06.2025
Oxunuş sayı: 674
