"QHT-lər COP29-la bağlı xüsusi təkliflərlə çıxış edəcək" - ÖZƏL
Ölkəmizin ev sahibliyi etdiyi BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası - COP29-a hazırlıq işləri davam edir. Bununla bağlı Qeyri- Hökumət Təşkilatlarının ( QHT) dəstəyinə də önəm verilir. QHT-lər COP29-la bağlı nə düşünür?
Mövzu ilə bağlı Crossmedia.az-a açıqlama verən “Milli Fikir və İnkişaf Mərkəzi” İctimai Birliyinin sədri Anar Turan bildirib ki, QHT-lər Azərbaycanda cəmiyyətin əsas hərəkətverici qüvvələrindən biri kimi COP29 tədbirlərində də xüsusi təkliflərlə çıxış edəcək:
"Ümumiyyətlə, bir sıra Qeyri-Hökumət Təşkilatlarının layihələri artıq hökümətimiz tərəfindən dəstəklənir. Qeyri - Hökümət Təşkilatlarına Dövlət Dəstəyi Agentliyi, Ekologiya və Təbii Sərvətlər Nazirliyi təşəbbüsləri dəyərləndirdi. 19 təşkilatın layihəsini maliyyələşdirməyi qərara aldı. Təbii ki, QHT-lərin irəli sürdüyü bu layihələr COP29-da qaldırılan məsələlərin hər birinə həsr olunub. Qaldırılan məsələlərə yaşıl və meşə zonalarının təbliğatı, mavi zonanın araşdırılması problemləri və perspektivləri aiddir. Bildiyiniz kimi, işğaldan azad olunmuş ərazilərdə yaşıl enerjinin yaradılması ilə bağlı prezidentin göstərişləri var. 2030-cu ilədək yaşıl enerji zonalarının yaradılması planı var. Yaşıl enerji zonalarının yaradılması üçün işğaldan azad edilmiş rayonlar çox böyük əhəmiyyət malikdir. Xüsusən, Kəlbəcər, Cəbrayıl, Zəngilan, Qubadlı, Şuşanın meşə örtüyü, su balansı kifayət edir ki, yaşıl enerji zonalarının, alternativ enerji mənbələrinin yaradılmasında rolu olsun. Bu baxımdan QHT-lərin bir çoxu bu kimi məsələlərdə layihələr hazırlayıb. Bu məsələlərin təbliğatı, araşdırılması, tərəfdaş dövlətlərin ölkə nümayəndələrinin həmin bölgələrdə iştirakını təmin etmək, onlarla birlikdə təlimlər keçirmək, müzakirələr aparmaq, yeni ideyalar, fikirlər ortaya qoymaq QHT-lərin dünyamiqyaslı böyük tədbirdə verə biləcəyi töhfələrdəndir. Düşünürəm ki, QHT-lər bu məsələlərdə öz potensiallarını yetərincə ortaya qoya biləcək".
Aysu İmrani
07:03 05.11.2024
Oxunuş sayı: 8149
