Yeni müharibənin bir addımlığında: "Yaxın Şərqdə vəziyyət nəzarətdən çıxa bilər"
İsrailin “Am Kelavi” adlandırılan genişmiqyaslı hərbi əməliyyatı zamanı İranın nüvə obyektələrinə birbaşa zərbələr endirməsi Yaxın Şərqdə və dünyada ciddi narahatlığa səbəb olub. Bu əməliyyat İsrailin uzun illərdir İrana qarşı apardığı mübarizənin daha açıq və kəskin mərhələyə keçdiyini göstərir.
İsrail hesab edir ki, İranın nüvə silahına sahib olması onun üçün böyük təhlükədir. Ona görə də İsrail indiyə qədər bu prosesin qarşısını almaq üçün həm diplomatik yollarla, həm də müxtəlif kəşfiyyat və kiber hücumlarla çalışıb. Lakin bu dəfəki hücum miqyasına görə əvvəlkilərdən fərqlənir və birbaşa müharibə ehtimalını artırır.
İran bu hücuma cavab olaraq birbaşa özü və ya müttəfiqləri vasitəsilə reaksiya verə bilər. Hizbullah, HƏMAS və Yəməndəki husilər kimi qrupların bölgədə müəyyən hərəkətlər etməsi gözlənilir. Bundan əlavə, ABŞ-İran münasibətləri də bu hücumdan sonra yenidən gərginləşib. Prezident Donald Trampın BMT Təhlükəsizlik Şurasını təcili toplantıya çağırması da vəziyyətin ciddi olduğunu göstərir.
Yaxın Şərq üzrə siyasi ekspert Vüqar Zifəroğlu Crossmedia.az-a açıqlamasında bildirib ki, bu hadisə sadəcə bir hücum deyil, həm də böyük bir eskalasiyadır. Onun fikrincə, İran cavab verərkən təkcə raketlərlə yox, həm də hibrid üsullarla – məsələn, kibertəhlükə və ya proksi qruplar vasitəsilə hərəkət edə bilər: "Artıq bəzi qruplar hücum olacağı təqdirdə cavabsız qoymayacaqları ilə bağlı açıqlamalar da veriblər. İranın “Apt33” və “Charming Kitten” kimi kiber qrupları İsrailin infrastrukturuna – su, enerji və rabitə sistemlərinə – zərər verməyə cəhd edə bilərlər. Bundan başqa, İsrail daxilində İrana bağlı olan şəxslər vasitəsilə də sabitlik pozula bilər. İranın birbaşa raket hücumu ehtimalı da var, amma tammiqyaslı müharibə indiki mərhələdə o qədər də real görünmür. İsrailin hava müdafiə sistemi – məsələn, “Dəmir Qübbə” – belə hücumları qarşılayacaq gücdədir. Amma bölgədəki ABŞ və ya İsrail tərəfdaşı olan ölkələrin bazalarına da zərbələr ola bilər".
Müsahibimizin fikrincə, bu hücum İranın daxilində də təsirsiz ötüşməyəcək: " Daha radikal qüvvələrin güclənməsi, ABŞ-la dialoqa tərəfdar olanların isə sıxışdırılması ehtimalı var. İran xalqı və siyasi dairələrində birbaşa müharibə çağırışları arta bilər. Bu prosesin qarşısını almaq üçün beynəlxalq vasitəçilər – məsələn, Çin, Türkiyə və ya Avropa İttifaqı – tezliklə diplomatik səylər göstərməlidir. Əks halda, bölgədə daha böyük və nəzarətdən çıxmış bir müharibə başlaya bilər".
Zəhra Ağayeva
11:02 13.06.2025
Oxunuş sayı: 30963
