“İkinci nəfəs” teatr-studiyası fəaliyyətə başlayıb
Prezident İlham Əliyevin “Azərbaycan peşəkar milli teatrının 150 illik yubileyinin qeyd edilməsi haqqında” sərəncamının icrası ilə əlaqədar olaraq, respublikanın 5 teatrında kadr problemini aradan qaldırmaq məqsədilə teatr-studiyaları yaradılıb.
Həmin sərəncama əsasən, Gəncə Dövlət Milli Dram Teatrının nəzdində “İkinci nəfəs” teatr-studiyası fəaliyyətə başlayıb.
Tədris müddəti ərzində tələbələr teatr sənətinin sirləri ilə yaxından tanış olaraq nəzəri və praktik biliklərə yiyələnmiş, eyni zamanda görkəmli teatr xadimlərinin ustad dərslərində və seminarlarında iştirak etmişlər.
Tədrisin yekun qiymətləndirilməsi və hesabat tamaşasının hazırlanması məqsədilə teatra dəvət olunmuş gənc rejissor Fuad Cavadzadənin quruluşunda, Əməkdar incəsənət xadimi Əli Əmirlinin “M.S.S” pyesi əsasında eyniadlı tamaşanın məşqlərinə start verilib.
Yeni səhnə əsərində teatr-studiyasının tələbələri ilə yanaşı, teatrın peşəkar aktyorları da iştirak edəcək.
Teatrın baş rejissoru Elşad Əhmədov və teatrın ədəbiyyat hissə müdiri, tədris rəhbəri, teatrşünas Anar Bürcəliyev çıxış edərək hər kəsə uğurlar arzulayıb və bildiriblər ki, hər iki heyətin qarşılıqlı tandemi əsasında hazırlanacaq tamaşa gənclərin debütü olmaqla yanaşı, onların peşəkar aktyorlarla səhnəyə uyğunlaşması, məsuliyyət hissinin artırılması və səhnə sərbəstliyinin formalaşmasına xidmət edəcək.
Tamaşanın premyerası haqqında əlavə məlumat veriləcək.
Ayan Sədi
18:04 07.06.2025
Oxunuş sayı: 928
