İqtisadiyyat
"Levıy" qaz, su işlədənlər - SİZİ 7 İL HƏBS GÖZLƏYİR
Ölkədə təbii qaz, elektrik enerjisi və sudan istifadə qaydaları Nazirlər Kabinetinin müvafiq normativ sənədləri ilə tənzimlənir. Kommunal xidmətlərdən yalnız qanunvericiliyə uyğun şəkildə, müqavilə bağlamaqla və standartlara cavab verən sayğaclar quraşdırmaqla istifadə edilməlidir. Bu şərtlərin pozulması, xüsusən də resursların talanması və şəbəkələrə qanunsuz qoşulma halında qanunvericilikdə ciddi inzibati və cinayət məsuliyyəti nəzərdə tutulur.
Mövzu ilə bağlı hüquqşünas Anar Ramazanov Crossmedia.az-a açıqlama verib.
Ekspert bildirib ki, vurulan ziyanın həcmindən asılı olaraq tətbiq edilən cəza tədbirləri fərqlənir:
"İnzibati Xətalar Məcəlləsinin (İXM) 282.1-ci maddəsinə əsasən, təbii qazın, elektrik və ya istilik enerjisinin talanması nəticəsində az miqdarda ziyan vurulduqda vətəndaşlar 100 manatdan 150 manatadək cərimə edilir. Məcəllənin 262.3-cü maddəsinə görə isə su təchizatı şəbəkəsinə qanunsuz qoşulmaqla suyun talanması az miqdarda ziyan vurduqda 200 manatdan 400 manatadək cərimə cəzası nəzərdə tutulur. Qanunvericiliyə əsasən, kommunal xidmətlərin talanması zamanı vurulan ziyanın məbləği 5000 manatdan çox olmadıqda bu, az miqdarda ziyan sayılır və inzibati məsuliyyət yaradır".
A.Ramazanov vurğulayıb ki, vurulan ziyanın həcmi 5000 manatdan yuxarı olduqda məsələ Cinayət Məcəlləsi (CM) ilə tənzimlənir və daha ağır sanksiyalar tətbiq olunur:
"Cinayət Məcəlləsinin 177.2.3-2-ci maddəsinə əsasən, dövlət və ictimai əhəmiyyətli qaz, elektrik, istilik, su və kanalizasiya xətlərinə, neft kəmərlərinə münasibətdə oğurluq törədilməsi cinayət hesab olunur. Məcəllənin 186 və 187-ci maddələrinə görə, sayğacı, boru kəmərini və ya digər avadanlıqları qəsdən və ya ehtiyatsızlıqdan məhv etmə və zədələmə də xeyli miqdarda ziyan vurduqda cinayət məsuliyyətinə səbəb olur. Xüsusilə CM-nin 189-1-ci maddəsi birbaşa şəbəkəyə qanunsuz qoşulmaqla resursların talanmasını tənzimləyir. Vurulan ziyan xeyli miqdarda (5.000 – 50.000 manat) olduqda 2 ilədək azadlığın məhdudlaşdırılması, külli miqdarda (50.000 – 500.000 manat) olduqda 3 ilədək azadlıqdan məhrumetmə, xüsusilə külli miqdarda (500.000 manatdan çox) olduqda isə 3 ildən 7 ilədək azadlıqdan məhrumetmə cəzası tətbiq edilir".
Ekspert sonda xəbərdarlıq edərək bildirib ki, kommunal xətlərə qanunsuz müdaxilələr təkcə maliyyə və hüquqi məsuliyyət yaratmır, eyni zamanda dövlət əmlakına zərər vurmaqla yanaşı həyati təhlükə də təşkil edir. İstehlakçılar bu tür qanunsuzluqlardan çəkinməli və xidmətlərdən yalnız təyin olunmuş müqavilə şərtləri çərçivəsində istifadə etməlidirlər".
Fatimə Cabbarlı
15:30 09.10.2026
Oxunuş sayı: 195
