“Peşəkar teatr dərsləri” layihəsinin növbəti mərhələsi Qaxda başa çatıb
Mədəniyyət üzrə Elmi-Metodiki və İxtisasartırma Mərkəzinin təşkilatçılığı ilə mayın 20-dən 24-dək İlya Çavçavadze adına Qax Dövlət Gürcü Dram Teatrında “Peşəkar teatr dərsləri” layihəsi çərçivəsində növbəti ustad dərslərinə yekun vurulub.
Crossmedia.az xəbər verir ki, layihənin əsas məqsədi region teatrlarında sənətin peşəkar əsaslarının tədrisi, nəzəri-praktiki təcrübə mübadiləsi yolu ilə yaradıcılıq mühitinin zənginləşdirilməsi və aktyorların peşəkarlıq səviyyəsinin artırılmasıdır.
Əməkdar artist, pedaqoq Qasım Nağı və teatrşünas Dağlar Yusif tərəfindən keçirilən dərslər zamanı aktyorların səhnə texnikası, tamaşaçı ilə ünsiyyət, rejissorla işləmək bacarığı, pyesin mənimsənilməsi, səhnə ritmika və plastikası, nitq mədəniyyəti kimi əsas keyfiyyətləri təkmilləşdirilib.
Mütəxəssislər tərəfindən keçirilən bu təlimlər ixtisasartırma, təcrübə mübadiləsi və aktyorluq potensialının inkişafı üçün geniş imkanlar yaradaraq Qax Dövlət Gürcü Dram Teatrının yaradıcılıq mühitinə töhfə verib.
Ayan Sədi
12:59 27.05.2025
Oxunuş sayı: 3335
