Gənclər Kitabxanasında Xalq şairi Bəxtiyar Vahabzadənin 100 illiyi münasibətilə metodik vəsait hazırlanıb
Respublika Gənclər Kitabxanasında Xalq şairi, dramaturq, ədəbiyyatşünas, pedaqoq və ictimai xadim, Dövlət mükafatları laureatı Bəxtiyar Vahabzadənin 100 illiyi münasibətilə “Mən ilk qaynağımdan türk oğlu türkəm” adlı metodik vəsait hazırlanıb.
Crossmedia.az kitabxanaya istinadla bildirir ki, vəsaitdə bu münasibətlə Azərbaycan Respublikası Prezidentinin Sərəncamının, akademik İsa Həbibbəylinin müəllifi olduğu “Milli istiqlal şairi Bəxtiyar Vahabzadə” adlı məqalənin tam mətni, elm, mədəniyyət, ədəbiyyat, mətbuat sahəsinin nümayəndələrinin, ictimai-siyasi xadimlərin onun haqqında söylədikləri dəyərli fikirlər yer alıb.
“Bəxtiyar Vahabzadə irsinin kitabxanalarda təbliği” başlığı ilə kitabxanalarda Xalq şairinin yubileyi çərçivəsində nəzərdə tutulan elektron məlumat bazasının, virtual və ənənəvi kitab sərgilərinin, təbliğat xarakterli materialların hazırlanması, kitab təqdimatı, ədəbi-bədii tədbirlərin, viktorinaların, müsabiqələrin keçirilməsi metodikası sahəsində tövsiyələr təqdim edilib. Metodiki vəsaitdə görkəmli şairin xatirəsinin əbədiləşdirilməsi haqqında məlumatlar da öz əksini tapıb. Ümumilikdə vəsait kitabxana işçiləri, BDU-nun İnformasiya və sənəd menecmenti fakültəsinin tələbələri, kütləvi tədbir keçirən təşkilatların əməkdaşları üçün nəzərdə tutulub.
Metodik vəsait kitabxananın rəsmi saytında yerləşdirilib.
16:40 20.05.2025
Oxunuş sayı: 642
