Türk Dünyası
Azərbaycanın MDB planı: Laçından nəqliyyat dəhlizlərinə qədər yeni hədəflər
Müstəqil Dövlətlər Birliyi (MDB) çərçivəsində siyasi dialoqun gücləndirilməsi, iqtisadi-logistik əlaqələrin şaxələndirilməsi və humanitar əməkdaşlığın dərinləşdirilməsi Azərbaycan üçün xüsusi əhəmiyyət kəsb edir. Azərbaycan Respublikasının Prezidenti İlham Əliyev Türkmanıstana səfəri çərçivəsində Aşqabad şəhərində keçirilən MDB Dövlət Başçıları Şurasının məhdud tərkibdəki iclasında çıxışı zamanı ikitərəfli və çoxşaxəli əməkdaşlığın prioritetlərini diqqətə çatdırıb.
Dövlət başçısı Azərbaycan–Türkmanıstan münasibətlərinin dinamik inkişaf tempini yüksək qiymətləndirərək, iki ölkə arasında siyasi dialoqun ali səviyyədə olduğunu vurğulayıb. Ötən dövr ərzində həyata keçirilən qarşılıqlı ali səfərlərin əməkdaşlıq üçün geniş imkanlar açdığı qeyd olunub. Qeyd edilib ki, 35 illiyini qeyd edən MDB platforması ötən illər ərzində siyasi dialoqun dəstəklənməsi və qarşılıqlı faydalı əlaqələrin möhkəmləndirilməsi baxımından səmərəli mexanizm kimi özünü təsdiqləyib. Çıxışda Laçın şəhərinin MDB-nin "Mədəniyyət Paytaxtı" elan edilməsi, ölkəmizin 7 şəhərində keçirilən III MDB Oyunları, eləcə də Azərbaycanın nəqliyyat-tranzit imkanlarının genişlənməsi xüsusi vurğulanıb:
Mövzu ilə bağlı Crossmedia.az-a açıqlama verən Milli Məclisin deputatı Elman Nəsirov bildirib ki, Azərbaycanın MDB çərçivəsində fəal iştirakı və irəli sürdüyü təşəbbüslər ölkəmizin həm regional, həm də beynəlxalq miqyasda artan nüfuzunun göstəricisidir:
Deputat qeyd edib ki, Azərbaycan ilə Türkmənistan arasında yüksək səviyyəli siyasi dialoq və mütəmadi təmaslar MDB məkanında qarşılıqlı etimadın möhkəmlənməsinə xidmət edir. 2025–2026-cı illərdə reallaşan qarşılıqlı ali səfərlər ikitərəfli münasibətlərin keyfiyyətcə yeni mərhələyə qədəm qoyduğunu nümayiş etdirir. Eyni zamanda, MDB-nin 35 illik tarixi fonunda bu platformanın siyasi dialoq və çoxtərəfli əməkdaşlıq mexanizmi kimi əhəmiyyəti bir daha təsdiqini tapır.
Humanitar sahədə əməkdaşlığın xüsusi yer tutduğunu deyən Elman Nəsirov Laçın şəhərinin Birliyin "Mədəniyyət Paytaxtı" elan olunmasını və burada keçirilən genişmiqyaslı tədbirləri işğaldan azad edilmiş ərazilərimizin dirçəlişinin beynəlxalq aləmdə təqdim olunması baxımından mühüm addım kimi dəyərləndirib. Həmçinin ölkəmizin 7 şəhərində 11 gün ərzində təşkil olunan III MDB Oyunları Azərbaycanın böyük idman yarışlarına və beynəlxalq tədbirlərə ev sahibliyi etmək imkanlarını bir daha nümayiş etdirib".
Elman Nəsirovun sözlərinə görə, dövlət başçısının vurğuladığı logistik göstəricilər Azərbaycanın Qərb–Şərq və Şimal–Cənub nəqliyyat dəhlizləri üzrə əsas qovşağa çevrildiyini təsdiqləyir: "2026-cı ilin birinci yarısında tranzit daşımaların 10% artaraq 8 milyon tona çatması və orta müddətli perspektivdə hər iki istiqamət üzrə ümumi həcmin 30 milyon tona çatdırılması hədəfi ölkəmizin iqtisadi potensialını kəskin artıracaq. Nəqliyyat infrastrukturu ilə yanaşı, institusional sahədə də vacib qərarlar qəbul olunub. 2026-cı ildə MDB-yə sədrliyi Türkmənistanın həyata keçirdiyini, 2027-ci ildə sədrliyin Özbəkistana keçəcəyini və Azərbaycanın həmsədr funksiyasını yerinə yetirəcəyini xatırladan deputat, 2028-ci ildə sədrliyin tam olaraq Azərbaycana həvalə ediləcəyini diqqətə çatdırıb. Həmin ilin payızında MDB Dövlət Başçıları Şurasının iclasının Azərbaycanda keçirilməsi haqqında qərar ölkəmizin beynəlxalq sammitlər və mötəbər tədbirlər təşkilindəki unikal təcrübəsinə olan yüksək etimadın bariz nümunəsidir".
Zeynəb Həsən
18:00 09.10.2026
Oxunuş sayı: 65
