Qardaşlıq strategiyası: İranın qonşuluq diplomatiyası yeni mərhələdə
İran Prezidenti Məsud Pezeşkianın mayın 15-də Kermanşah əyalətində investorlarla görüşdə səsləndirdiyi fikirlər, Tehranın qonşu ölkələrlə, o cümlədən Azərbaycanla qardaşlıq və bərabərlik prinsipləri əsasında münasibətlər qurmaq istəyini nümayiş etdirir. ABŞ Prezidenti Donald Trampın Səudiyyə Ərəbistanındakı bəyanatına istinad edən Pezeşkian bildirib ki, İran həm ölkə daxilində, həm də qonşularla münasibətlərdə sülh və əmin-amanlıq axtarır.
Politoloq Qalib Ağayev məsələ ilə bağlı Crossmedia.az-a açıqlama verdi. Onun sözlərinə görə, İran prezidenti Pezeşkianın qonşu ölkələrlə, o cümlədən Azərbaycan, Rusiya, Əfqanıstan, Pakistan, İraq və Səudiyyə Ərəbistanı ilə qardaş və bərabər hüquqlu münasibətlər qurmaq arzusunu ifadə etməsi, bölgədəki cari siyasi dinamikaların əhəmiyyətli bir göstəricisidir: "Bu mövqe, İranın həm ölkə daxilində, həm də qonşu dövlətlərlə münasibətlərin yaxşılaşdırılmasına olan meylini nümayiş etdirir, çətin geosiyasi şəraitdə sülh və sabitlik ehtiyacına vurğu edir.
ABŞ prezidenti Donald Trampın Səudiyyə Ərəbistanında etdiyi son bəyanatlara istinad, beynəlxalq siyasi kontekstin əhəmiyyətini vurğulayır ki, bu da İranın daxili və xarici istəklərinə təsir edir. İranın qonşu ölkələrlə qarşılıqlı faydalı və balanslı münasibətlər qurmaq marağı, Amerika Səudiyyə alyansının mümkün təhlükə kimi qəbul edilməsinin aradan qaldırılması cəhdləri kimi də qiymətləndirilə bilər".
Politoloqun fikrincə Azərbaycan kimi dövlətlərlə yaxşı münasibətlərin qurulması yalnız mədəni və iqtisadi inteqrasiya üçün deyil, eyni zamanda dayanıqlı təhlükəsizlik mexanizminin yaradılması üçün də vacibdir: "Bölgədə artan siyasi qeyri-sabitlik və münaqişələr şəraitində bu cür təşəbbüslər regional təhlükəsizliyin və əməkdaşlığın gücləndirilməsi istiqamətində daha geniş bir strateji formulasiya üçün baza rolu oynaya bilər.
Beləliklə, prezident Pezeşkianın qonşu ölkələrlə qardaş və bərabər hüquqlu münasibətlər inkişaf etdirmək istəyi, bu geostrateji əhəmiyyətə malik bölgədə qarşılıqlı fəaliyyətə dair dərin elmi və siyasi müzakirələr üçün yeni perspektivlər açır, sülh və irəliləyişə nail olmaq üçün birgə səylərin zəruriliyini vurğulayır".
Həmayıl Şükürlü
12:44 15.05.2025
Oxunuş sayı: 13156
