"Tehran regionda Bakının maraqlarından kənar addımlar ata bilməyəcəyi reallığını qəbul edib" - POLİTOLOQ
İranın xarici işlər nazirinin müavini, Xarici İşlər Nazirliyinin Siyasi və Beynəlxalq Araşdırmalar Mərkəzinin rəhbəri Səid Xətibzadə Bakıda Beynəlxalq Münasibətlərin Təhlili Mərkəzində (BMTM) keçirilən tədbirdə deyib ki, rəsmi Tehran Azərbaycan və Ermənistan arasında sülh mətni layihəsinin razılaşdırılmasını alqışlayır.
Onun sözlərinə görə, İran Pezidenti Azərbaycanla Ermənistan arasında sülh sazişinin imzalanmasında vasitəçilik edə bilər:
"İnanıram ki, hər iki ölkənin gündəlik əlaqələrində bu məsələ də öz əksini tapacaq".
İran rəsmiləri əvvəllər də dəfələrlə oxşar motivlər səsləndiriblər. Amma zaman - zaman cənub qonşumuzun əməli ilə sözünün üst- üstə düşməməsinin şahidi olmuşuq. Maraqlıdır, bəs bu dəfə İran nə qədər səmimidir?
Bu barədə Crossmedia.az-a danışan politoloq Aytən Qurbanova İranın heç bir halda regionda sülh və sabitliyin təmin olunmasına maraqlı olmamasını vurğulayıb: "Əslində İranda Məsud Pezeşkianın dövrü olaraq xarakterizə edə biləcəyimiz strateji hədəf yoxdur. Bu o deməkdir ki, İranda İbrahim Rəisi dövrundə olandan fərqli istiqamətlərdə regional maraqlarla bağlı konkret dəyişikliklər hazırda tam müşahidə edilmir. Amma onu da nəzərə almaq lazımdır ki, həm Pezaşkianın Azərbaycana səfəri, həm də həmin səfərə qədər verilən mesajlar göstərir ki, Tehran regionda Bakının maraqlarından kənar addımlar ata bilməyəcəyi reallığını qəbul edib".
Politoloqun sözlərinə görə, İran rəsmilərinin bəyanatları bir çox halda reallığı ifadə etməyə bilər: "Bunu yaxın keçmiş də sübut edir. Ümid edək ki, bu dəfə verilən bəyanatlar özünü doğruldacaq. Belə olsa, onda İranın xarici siyasətində müəyyən dəyişikliyin olduğunu deyə bilərik".
Fatimə Məmmədova
16:49 06.05.2025
Oxunuş sayı: 24931
