Almaniya kansleri Ukraynanın Rusiyanın neft emalı zavodlarına zərbələrini əsaslandırıb
Almaniya kansleri Fridrix Merts Ukraynanın Rusiyadakı neft emalı zavodlarına hücumlarını müdafiə edərək, bu zərbələrin Moskvanın müharibə aparmaq imkanlarını zəiflətdiyini bildirib.
Crossmedia.az xəbər verir ki, Merts bu barədə Brüsseldə Avropa İttifaqı sammitindən sonra jurnalistlərə açıqlamasında danışıb.
Kanslerin sözlərinə görə, Rusiya tərəfi, o cümlədən Prezident Vladimir Putin münaqişəni başa çatdırmağa hazır olduğunu nümayiş etdirmir. Əksinə, Mertsin iddiasına görə, Moskva qış ərəfəsində döyüşləri daha da şiddətləndirməyə çalışır.
O qeyd edib ki, Ukraynanın enerji infrastrukturu ciddi zərbələrə məruz qalır, elektrik enerjisinin ötürülməsi şəbəkələri də hücumların hədəfinə çevrilir. Mertsin fikrincə, Rusiyanın məqsədi Ukrayna üçün qış şəraitini mümkün qədər ağırlaşdırmaqdır.
“Belə bir şəraitdə Ukraynanın Rusiya hökumətinin və ordusunun müharibə aparmaq imkanlarına mane olan hədəflərə zərbələr endirməsi tamamilə doğru, əsaslı və anlaşılandır. Bu, həm rabitə, həm də enerji təchizatı sahəsinə aiddir”, – deyə kansler bildirib.
Merts vurğulayıb ki, Ukraynanın Rusiyaya özünü ciddi şəkildə müdafiə etməyə hazır olduğunu göstərmək imkanlarından biri də məhz bu cür zərbələrdir.
Kansler əlavə edib ki, Almaniya və Avropa Ukraynaya dəstəyi davam etdirəcək. Onun sözlərinə görə, məqsəd müharibəni uzatmaq deyil, Rusiyanı danışıqlar masasına gətirməkdir.
02:35 17.10.2026
Oxunuş sayı: 46
