Qarabağda keçirilən ultramarafon gürcü iştirakçılarda dərin təəssürat yaradıb
Azərbaycanın Gürcüstandakı səfiri Faiq Quliyev “Konstitusiya və Suverenlik” ili çərçivəsində aprelin 10-dan 13-dək Qəbələ-Xankəndi marşrutu üzrə baş tutmuş ultramarafonun Gürcüstandan olan iştirakçıları ilə görüşüb.
Crossmedia.az xəbər verir ki, görüş zamanı səfir ölkəmizdə, xüsusən də işğaldan azad olunmuş ərazilərdə beynəlxalq səviyyəli tədbirlərin keçirilməsinin artıq mütəmadi hal aldığını qeyd edib.
Bildirib ki, bu tip tədbirlər vasitəsilə beynəlxalq ictimaiyyətin 30 illik işğal dövründə Qarabağda törədilən urbisid və digər cinayətlər barədə məlumat almasına, habelə burada müxtəlif ölkələrin nümayəndələrinin dostlaşmasına şərait yaradılır.
F.Quliyev, eyni zamanda, Qarabağ İqtisadi rayonunda aparılan bərpa işləri barədə məlumat verib, ölkələrin ərazi bütövlüyünün təmin olunmasının regionda sabitliyə yol açdığını diqqətə çatdırıb.
Marafonçular ölkəmizdə tədbirin yüksək səviyyədə təşkil olunduğunu qeyd edib, zəruri təminat və təhlükəsizlik tələblərinə ciddi riayət edilməsinə və iştirakçıların hər birinə xüsusi diqqət ayrılmasına, habelə onların iştirakı üçün səfirlik tərəfindən göstərilən səylərə görə təşəkkürlərini bildiriblər.
Qarabağda olarkən Azərbaycan həqiqətləri ilə daha yaxından tanış olduqlarını vurğulayan iştirakçılar, dövlətimiz tərəfindən həmin ərazilərdə quruculuq-bərpa işlərinin yüksək templə aparılaraq, qısa müddət ərzində xeyli sayda infrastruktur layihələrin icra edilməsini yüksək qiymətləndiriblər.
Marafon iştirakçıları növbəti müddət ərzində də bu tip tədbirlərə qatılmağı planlaşdırdıqlarını bildiriblər.
Qeyd edək ki, 6 ölkədən 83 iştirakçının qatıldığı marafonda Gürcüstandan 9 namizəd iştirak edib. Onların sırasından 73 yaşlı Tenqiz Latsabidze yarışın ən yaşlı iştirakçısı olub.
Kişilər arasında marafonda Gürcüstan komandasından Giorqi Lomidze 3-cü yeri, Tamilla Şaruxia isə öz yaş kateqoriyasında 1-ci yeri tutub.
20:05 02.05.2025
Oxunuş sayı: 9712
