Ərdoğanın səfəri: Türkiyə, Azərbaycan və Pakistan birlikdə hərəkət edəcək - RƏY
Türkiyə, Azərbaycan və Pakistan arasında strateji əməkdaşlıq bölgədə yeni siyasi və hərbi balansların yaranmasına zəmin yaradır. Ərdoğanın Pakistana gözlənilən səfəri bu üç ölkənin daha sıx birliyə doğru addım atdığının göstəricisi kimi qiymətləndirilir.
Politoloq Hüseyn İbrahimov Crossmedia.az-a açıqlamasında bildirib ki, Türkiyə Prezidenti Rəcəb Tayyib Ərdoğanın Pakistana rəsmi səfəri, həm rəsmi görüşləri, həm də verdiyi açıqlamaları ilə diqqət çəkir. O, həm dövlət rəsmiləri, həm də baş nazir ilə keçirilən görüşlərdə bir sıra mühüm mövzulara toxundu.
Ekspertin fikrincə, Ərdoğanın çıxışlarının müqayisəsi göstərir ki, bu səfər Yaxın və Orta Şərqdəki bir çox sosial, iqtisadi, siyasi və hərbi məsələlərin araşdırılması və həlli baxımından əhəmiyyətli addımdır. O qeyd edib ki, bu görüşlər bölgənin gələcək geosiyasi mənzərəsinə ciddi təsir göstərə bilər.
Hüseyn İbrahimovun dediyinə görə, xüsusilə Ərdoğanın “Azərbaycan və Pakistanla birlikdə yeni addımlar atacağıq” bəyanatı bu əməkdaşlığın təkcə Cənubi Qafqaz və Azərbaycanın lider mövqeyi ilə məhdudlaşmayacağını, eyni zamanda Yaxın və Orta Şərqin daha geniş ərazilərini əhatə edəcəyini göstərir.
Ekspert bildirib ki, Ərdoğan bu səfər çərçivəsində siyasi, iqtisadi və enerji sahələrinə toxunmaqla yanaşı, bir sıra rəsmilər ilə də görüşlər keçirib. Bu isə görüşün yalnız regional deyil, eyni zamanda qlobal miqyasda da əhəmiyyət daşıdığını göstərir. Onun çıxışlarında Fələstin məsələsinə xüsusi diqqət ayrılması isə Türkiyənin bu mövzudakı prinsipial mövqeyini bir daha ortaya qoydu.
Hüseyn İbrahimov qeyd edib ki, Ərdoğanın açıqlamaları Azərbaycanın da bu prosesin ayrılmaz bir parçası olduğunu göstərir. “Azərbaycan həm müsəlman ölkəsi, həm enerji ehtiyatlarına malik bir dövlət, həm də ədalətli müharibədən qalib çıxmış bir ölkə olaraq bu əməkdaşlıqda önəmli rol oynayır,” – deyə politoloq vurğulayıb.
Politoloq əlavə edib ki, Pakistan hərbi baxımdan güclü bir ölkədir və onun Azərbaycanla münasibətləri daim səmimi və etibarlı olub. Vətən müharibəsi dövründə də Pakistan Azərbaycanın mövqeyini açıq şəkildə dəstəkləmişdi. Bu baxımdan Ərdoğanın səsləndirdiyi fikirlər üç ölkə arasında gələcək strateji əməkdaşlığın əsas istiqamətlərinə dair ciddi mesajlar verir.
Fatimə Nəbiyeva
17:38 23.04.2025
Oxunuş sayı: 667
