Mina təhlükəsi bərpa işlərinə ciddi maneədir - Deputat
Qarabağ torpaqlarında səssiz ölüm maşınına çevrilmiş minalar hər gün yeni faciələrə yol açır. Bu təhlükənin kökündə isə Ermənistanın məqsədli mina siyasəti dayanır. Azərbaycan torpaqlarında hər partlayış Ermənistanın məsuliyyətsizliyini və təxribat siyasətini bir daha üzə çıxarır.Ermənistanın mina terroru bu gün də davam edir və mina xəritələri ətrafında manipulyasiyalar hələ də səngiməyib.
Bu barədə Milli Məclisin deputatı Tural Gəncəliyev Crossmedia.az-a açıqlama verib: “Vaxtilə təqdim olunan mina xəritələrinin cəmi 25 %-nin doğru olduğu iddia edilirdi. Ancaq aparılan müşahidələr və yerindəki nəticələr bu 25 % rəqəminə belə şübhə ilə yanaşmağı zəruri edir. Reallıq isə ondan ibarətdir ki, mina problemi Ermənistanın Azərbaycana qarşı siyasi təzyiq alətinə çevrilib. Bu, həm insanların doğma torpaqlarına və keçmiş məcburi köçkünlərin öz yurdlarına dönüşünü ləngidir, həm də hər gün yeni insan həyatlarına son qoyur və ya ömürlük fiziki və psixoloji travmalara səbəb olur.
Ermənistan bu günə qədər nə məsuliyyət daşıdığını etiraf edib, nə üzr istəyib, nə də kompensasiya ödəməyə hazır olduğunu göstərib. Mina problemi təkcə humanitar deyil, eyni zamanda böyük siyasi əngəldir. Bu gün Qarabağda və azad edilmiş digər ərazilərdə bərpa-quruculuq işlərinin geniş vüsət almasına mina təhlükəsi ciddi şəkildə maneə törədir”.
Tural Gəncəliyev onu da bildirdi ki, mina problemi təkcə humanitar yox, həm də siyasi böhrandır: “Ermənistan sülh prosesini ləngitmək üçün mina problemini bir vasitəyə çevirib. Halbuki əgər bu ölkədə sülhə dair hər hansı niyyət olsaydı, ən azından humanitar jest olaraq üzr istəyə, dəqiq mina xəritələri təqdim edə və ya ərazilərin təmizlənməsi üçün Azərbaycana dəstək göstərə bilərdi. Amma biz nə görürük? Ermənilər, əksinə, mina terrorunu informasiya savaşında alətə çevirərək, beynəlxalq ictimaiyyətdə özlərini “haqlı tərəf” kimi təqdim etməyə çalışırlar”.
Deputat sonda vurğuladı ki, Ermənistan nəinki məsuliyyət hissi göstərmir, bu insanların taleyinə biganə yanaşan havadarları da “susqun müşahidəçi” kimi davranırlar: “Artıq 400-ə yaxın vətəndaşımız mina partlayışları nəticəsində həyatını itirib və ya yaralanıb. Bu isə bir daha sübut edir ki, mina problemi təsadüf deyil və planlı şəkildə davam etdirilən qəsddir. Bu qəsd yalnız insan həyatını deyil, həm də sülhə gedən yolu hədəfə alır”.
Həmayıl Şükürlü
16:49 23.04.2025
Oxunuş sayı: 937
