Tramp Kremlin onu “oynatdığı” fikirlərinə münasibət bildirib: “Ömrüm danışıqlarda keçib, bilirəm ki…”
ABŞ Ukrayna ilə Rusiya arasındakı sülh danışıqlarından imtina edə bilər
ABŞ Prezidenti Donald Tramp bildirib ki, əgər Ukrayna və Rusiya arasında danışıqlarda irəliləyiş olmasa, Vaşinqton bu ölkələr arasında daimi atəşkəs əldə etmək cəhdlərindən əl çəkə bilər. Həmçinin, hər iki tərəfdən müharibəyə son qoymaq üçün həvəs"görmək istəyir: "Düşünürəm ki, bu həvəs var. Hər şey həlledici nöqtəyə çatır".
Crossmedia.az xəbər verir ki, bu barədə "Sky News" nəşri məlumat verib.
Belə ki, prezident administrasiyası əvvəllər münaqişəni tez bir zamanda bitirəcəyinə əmin olduğunu bildirsə də, bu nikbinlik gerçəkləşməyib. ABŞ-nin dövlət katibi Mark Rubio isə son açıqlamasında Ağ Evin danışıqlardan əl çəkə biləcəyini söyləyib.
Dövlət katibinin sözlərinə görə, iki ay əvvəl Rusiya prezidenti Vladimir Putinlə başlanan danışıqlara baxmayaraq, döyüşlərin sonu görünmür. Tramp Kremlin onu “oynatdığı” fikirlərini isə rədd edib: "Məni heç kim oynatmır. Mən kömək etməyə çalışıram. Bütün həyatım danışıqlarla keçib. Kimin bizi oynatdığını, kimin isə ciddi olduğunu yaxşı bilirəm".
Bildirilib ki, Trampın sülh danışıqlarından çəkilmə ehtimalını dilə gətirməsi onun prosesdən narazılığını göstərir.
Məlumata görə, Tramp seçkilərdə qalib gəlməzdən əvvəl bu müharibəni bir günə bitirə biləcəyini iddia edib.
Rusiya tərəfi isə danışıqlarda irəliləyiş olduğunu bildirsə də, Kremlin sözçüsü Dmitri Peskov prosesin "çox çətin" olduğunu etiraf edib. Həmçinin, əvvəllər razılaşdırılmış 30 günlük enerji infrastrukturuna hücum moratoriumunun hər iki tərəf tərəfindən pozulduğu bildirilir.
Ukrayna prezidenti Volodimir Zelenski isə rusiyalı həmkarı Vladimir Putinin müharibəni bitirməkdə ciddi olmadığını bildirib.
Tramp ABŞ-nin Ukraynaya hərbi yardım müqabilində ölkənin təbii resurslarından gəlir əldə etməsini istəyir. Onun fikrincə, bu, eyni zamanda sülhün qorunmasına da xidmət edə bilər.
Fatimə Məmmədova
20:46 19.04.2025
Oxunuş sayı: 8258
