Tramp administrasiyası ilə Harvard Universiteti qarşı-qarşıya gəlib
ABŞ-də Donald Tramp administrasiyası ilə Harvard Universiteti arasında gərginlik yaşanıb. Buna səbəb, Fələstinə dəstək aksiyalarında ön plana çıxan Harvard Universitetinə əvvəlcədən razılaşdırılmamış məktubun göndərilməsi olub.
Crossmedia.az xəbər verir ki, bu barədə “TRT” Haber məlumat yayıb.
Belə ki, aprelin 11-də Ağ Evə bağlı Antisemitizmə Qarşı Mübarizə Qüvvəsi tərəfindən universitet rəhbərliyinə göndərilən məktubda federal hökumətin Harvardda islahat aparılması tələbləri yer alıb. Məktubun müəllifi, Antisemitizm Qüvvəsinin üzvü və ABŞ Səhiyyə və İnsan Xidmətləri Nazirliyinin baş məsləhətçi müavini Şon Keveney olub.
Qeyd olunub ki, məktubun göndərilməsi ilə bağlı Ağ Ev daxilində fikir ayrılığı yaranıb. Bəziləri məktubun vaxtından əvvəl göndərildiyini, digərləri isə onun ümumiyyətlə universitetə ünvanlanmamalı olduğunu bildirib.
Hadisədən sonra federal hökuməti təmsil edən və ABŞ Ümumi Xidmətlər İdarəsinin yüksək vəzifəli əməkdaşı Coş Gruenbaum Harvard rəhbərliyi ilə əlaqə saxlayıb. O və Təhsil Nazirliyinin baş məsləhətçi müavini Tomas Uiler məktubun göndərilməsinə heç bir rəsmi icazə verilmədiyini vurğulayıblar.
Bundan sonra Harvard Universitetində daxili toplantı keçirilib və bir çox iştirakçı məktubun "səhvən" göndərildiyinə inanıb.
Tramp administrasiyası Fələstin tərəfdarı aksiyalar və universitetlərdəki müxtəliflik, bərabərlik və inklüzivlik proqramlarını əsas gətirərək, bir çox ali təhsil müəssisəsini federal maliyyəni dayandırmaqla hədələyib.
Qeyd edək ki, Harvard Universitetinə ayrılan 8,7 milyard dollardan artıq maliyyənin "vətəndaş hüquqları qanunlarına uyğun istifadə olunub-olunmadığını" araşdırmaq üçün istintaq başladılıb.
Belə ki, universitet rəhbərliyi Trampın reform tələbini rədd edib. Professor heyəti isə bu qərara qarşı məhkəməyə müraciət edib. Tramp administrasiyası cavab olaraq, Harvard üçün nəzərdə tutulmuş 2,2 milyard dollarlıq federal fondu və 60 milyon dollarlıq müqavilə vəsaitini dondurub.
Ağ Evin sözçüsü Karoline Leavitt bu addımı antisemitizmə qarşı qanunların tətbiqi ilə əsaslandırıb. ABŞ Vergi İdarəsi (IRS) isə Harvardın vergi imtiyazlarının ləğvini nəzərdən keçirdiyini bildirib.
Fatimə Məmmədova
21:30 19.04.2025
Oxunuş sayı: 1106
