İran ABŞ-la nüvə danışıqları öncəsi Rusiyadan dəstək istəyir
İran bu həftə sonu Romada keçiriləcək danışıqların ikinci raundu ərəfəsində Rusiyanın dəstəyinə ümid edir. İranın xarici işlər naziri Abbas Əraqçi bildirib ki, ötən həftə Omanda keçirilən ilk raund barədə rusiyalı həmkarı Sergey Lavrovu məlumatlandırıb.
Crossmedia.az xarici mediaya istinadən bildirir ki, Əraqçi Moskvada Lavrovla birgə keçirdiyi mətbuat konfransında 2015-ci ildə imzalanmış nüvə sazişində Rusiyanın rolunu yüksək qiymətləndirib və yeni sazişdə də dəstəyi davam etdirəcəyinə ümid etdiyini deyib. Lavrov isə bildirib ki, Rusiya həm vasitəçi, həm də yardımçı rolunda çıxış etməyə hazırdır.
Xatırladaq ki, 2015-ci il razılaşması ABŞ-ın 2018-ci ildə ondan birtərəfli çıxması ilə pozulub. Bundan sonra İran nüvə proqramını genişləndirərək uranı 60 faiz saflığa qədər zənginləşdirib. Əraqçi həmçinin Rusiya prezidenti Vladimir Putinlə görüşərək Ayətullah Əli Xameneinin mesajını çatdırdığını da bildirib.
Zəhra Ağayeva
16:29 19.04.2025
Oxunuş sayı: 6312
