Azərbaycan oftalmologiya məktəbinin əsasını qoyanlardan biri məhz Zərifə Əliyevadır
Bu gün Azərbaycanın görkəmli elm insanı, akademik, elmlər doktoru, oftalmoloq Zərifə xanım Əliyevanın anım günüdür. Zərifə xanım Azerbaycan tibb sahəsində, elmi-ictimai-mədəni mühitində öz imzası ilə seçilən görkəmli alim, ictimai xadimdir.
Crossmedia.az Zərifə xanım Əliyevanın anım günü ilə bağlı Milli Məclisin deputatı Aydın Mirzəzadənin də fikirlərini öyrənib:
"Zərifə xanım Əliyeva Azərbaycan ictimai fikrində böyük hörmətə malik olan bir xanım kimi tanınır. Görkəmli dövlət xadimi Əziz Əliyevin övladı olmasına baxmayaraq o, özü öz adını tarixə yazdı. Həkim, ictimai xadim, sonradan Azərbaycan tarixində böyük rol oynayacaq şəxslərin anası kimi, Zərifə xanım bu gün də sevilir və onun haqqında ən xoş xatirələr söylənir.
Ulu öndər Heydər Əliyevin həyat yoldaşı, daim ona dəstək olmuş, onun nəailiyyətlərinin daha yaxşı olması üçün bir məsləhətçi kimi Zərifə xanım daima dəstək göstərmişdir. Eyni zamanda sahib olduğu həkimlik peşəsində də böyük uğurlar qazanan Zərifə xanım elmlər doktoru, akademik adlarına layiq görülmüşdür. Oftalmologiya sahəsində görkəmli mütəxəssis olan Zərifə Əliyeva keçmiş SSRİ məkanında tanınır və fikirlərinə böyük hörmətlə yanaşılır. Azərbaycan oftalmologiya məktəbinin əsasını qoyanlardan biri məhz Zərifə Əliyevadır. Bu gün Azərbaycanın bir çox görkəmli göz həkimləri məhz Zərifə xanımın tələbələrdir.
Zərifə xanım Azərbaycan qadını obrazını uğurla yarada bildi. Onunla bağlı xatirələr onun tanınmış insanın həyat yoldaşı ilə yanaşı eyni zamanda çox yaxşı bir insan kimi də həmişə hörmətlə xatırlanır. Övladlari Sevil xanım və cənab prezident İlham Əliyevin Azərbaycana layiqli vətəndaş kimi böyüməsində Zərifə xanımın böyük xidməti var. Bugün onun anım günündə hər birimiz Azərbaycanın seçilən xanımları içərisində Zərifə xanımın adını xüsusilə qeyd edirik".
Ayhan Ağarzayev
11:52 15.04.2025
Oxunuş sayı: 4565
