"Tanrıya 14 məktub" yenidən səhnədə
Aprelin 13-də Azərbaycan Dövlət Milli Gənc Tamaşaçılar Teatrı dəyərli tamaşaçılar üçün təsirli bir səhnə əsərini yenidən təqdim etdi. Fransız yazıçısı Erik Emmanuel Şmidtin "Oskar və çəhrayı dama" əsəri əsasında hazırlanmış “Tanrıya 14 məktub” tamaşası iki hissədən ibarət dramatik bir hekayə ilə teatrsevərlərə nümayiş olundu.
Crossmedia.az xəbər verir ki, Tamaşanın quruluşçu rejissoru əməkdar artist Nicat Kazımovdur. Səhnə əsərində əsas rolları Zemfira Əbdülsəmədova, Anar Səfiyev və Mirsənan Kazımov canlandırırlar.
Əsərin mərkəzində qan xərçəngindən əziyyət çəkən 10 yaşlı Oskar dayanır. Tamaşa ölümlə üz-üzə dayanan bir uşağın həyatın son 10 günü ərzində keçirdiyi daxili dəyişikliklərdən, Roza nənənin mənəvi dəstəyi ilə dünyaya baxışını dəyişməsindən bəhs edir. Oskar bu çətin həyat sınağında ruhən böyüyür, dünyanı dərk etməyə başlayır. Lakin ayrılıq, sevdiklərindən vidalaşmaq onun üçün də ağırdır. Anar Səfiyevin canlandırdığı bu obraz tamaşaçılarda yaddaşlardan silinməyəcək bir iz buraxır.
Tamaşa ağır dramatizmi ilə seçilsə də, plastik həll və səhnə quruluşu ilə bəşəri duyğuları ön plana çıxarır. Əsər tamaşaçılara Allaha inam, şükür etmə bacarığı və ən əsası, bir-birinə dayaq olmağın vacibliyini aşılayır.
Səhnə əsərinə işıq və musiqi effektləri xüsusi bir poetiklik qatır, tamaşanın emosional təsirini daha da gücləndirir.
Ayan Sədi
14:30 14.04.2025
Oxunuş sayı: 8473
