Trampın İrana mesajı: Diplomatiya, yoxsa son xəbərdarlıq
ABŞ-İran münasibətləri son illərdə çox mürəkkəb mərhələlərdən keçib. ABŞ Prezidenti Donald Trampın son açıqlaması bunun növbəti təzahürüdür. Belə ki, o, söyləyib ki, ABŞ lazım gələrsə, İrana qarşı hərbi güc tətbiq etməyə hazır olacaq.
"Lazım gəlsə, mütləq. Bəli", - o, məsələ ilə bağlı sualı cavablandırarkən deyib.
Tramp qeyd edib ki, İranla Omanda keçiriləcək məsləhətləşmələr uzun prosesin yalnız başlanğıcı olacaq. "Az vaxtımız var. Bir az vaxtımız var, çünki onların nüvə silahı əldə etməsinə imkan verməyəcəyik", - ABŞ Prezidenti deyib.
"Mən çox şey istəmirəm. Onların nüvə silahı ola bilməz", - o təkrar edib.
Rəsmi Vaşinqton Tehrana qarşı siyasətini gücləndirməyə davam edir. Bu proses İrana hərbi müdaxilə ilə nəticələnə bilərmi? Bu barədə Crossmedia.-az-a danışan politoloq, professor Əlimusa İbrahimov söyləyib ki, İranla İsrail-ABŞ arasında müharibənin baş verəcəyi ehtimalı hazırda beynəlxalq səviyyədə ən çox müzakirə olunan məsələlərdəndir: “ABŞ ilə İran arasında danışıqların şənbə gününə təyin olunmasına baxmayaraq, müharibə təhlükəsi hələ də aradan qalxmayıb. Danışıqlara gedən tərəflər hələ də bir-birini ittiham etməkdə davam edirlər. ABŞ Prezidenti növbəti dəfə İranı hədələyərək, razılıq əldə olunmasa, müharibənin qaçılmaz olacağını bildirib. İran tərəfi isə yenidən onları qane etməyən bir razılaşmaya qol qoymayacaqlarını bəyan edib. Danışıqların hansı notlar əsasında bitəcəyindən asılı olmayaraq, uzun müddətdir düşmən olan dövlətlərin dialoqa başlaması müsbət haldır. Bu danışıqlar nəticəsindən asılı olmayaraq düşmənliyin 50 faiz azalması ilə nəticələnə bilər.Fikrimcə, şənbə günündən sonra ABŞ ilə İran arasında uzun-uzadı danışıqlar marafonunun şahidi olacağıq”.
Onun sözlərinə görə, bu iki dövlət arasında müharibəyə gəlincə, bir sıra səbəblərə görə bu müharibənin baş verməsi ehtimalı çox aşağıdır: “Bu səbəblərin bəzilərinə diqqət çəkmək istərdim. Birincisi, Tramp müharibə prezidenti deyil. O, hakimiyyətə gələndə mövcud müharibələrin qarşısını almağa söz verib, yeni müharibə ocaqları yaratmağa yox. İkincisi Tramp bu gün müharibə və hərbi xərclərə sərf olunan vəsaitləri azaltmaqla ölkəsinin büdcəsini gücləndirməyi daha çox düşünür, nəinki bu büdcədən müharibələrə pul xərcləməyi. Həmçinin, ABŞ əslində İrana qarşı müharibədə ciddi maraqlı deyil və Trampın savaşla barədə verdiyi bəyanatlar İsrailin oyununu oynamağa xidmət edir. Tramp son çıxışında da İsrailin bu istiqamətdəki rolunu vurğulayaraq bildirdi ki, olası müharibədə İsrailin rolu böyük olacaq”.
Həmayıl Şükürova
15:30 10.04.2025
Oxunuş sayı: 8497
