Rusiya real iradə ortaya qoymur: “Müharibə iştirakçılarının sayı arta bilər”
NATO-nun Baş katibi Mark Rutte hesab edir ki, hazırda Ukraynada nizamlanma Rusiya tərəfindən asılıdır, Moskva daha sürətli hərəkət etməlidir.
O, bu barədə CBS telekanalına müsahibəsində bildirib.
"Top rusiyalıların tərəfindədir. Onlar kifayət qədər sürətli hərəkət etmirlər, mənim təəssüratım belədir", - o qeyd edib.
M.Ruttenin sözlərinə görə, rusiyalılar həmçinin "tanqo rəqsi etməlidirlər": "Lakin hazırda onlar görünür, bunu etmirlər, ukraynalılar isə həqiqətən də amerikalıların mövqeyinə yaxındırlar".
Baş katib qeyd edib ki, ABŞ və onun NATO üzrə müttəfiqləri Rusiyaya qarşı "tandemdə işləyirlər" ki, qismən atəşkəsin detallarını razılaşdırsınlar və müharibənin dayandırılmasına nail olsunlar.
NATO Baş katibi əlavə edib ki, bu təəssürat "amerikalı həmsöhbətlərlə" müzakirələrə əsaslanır.
Onun fikrincə, məhz ABŞ Prezidenti Donald Tramp Ukraynada sülh prosesinə təkan verib.
Baş katibin səsləndirdiyi fikirlər barədə Crossmedia.az-a danışan politoloq Aytən Qurbanova bildirib ki, Rutte-nin son bəyanatları Rusiya-Ukrayna müharibəsi ilə bağlı gedən diplomatik müzakirələrin ümumi vəziyyətini əks etdirir. Onun sözlərinə görə, Rusiyanın atəşkəslə bağlı qeyri-müəyyən mövqeyi və bu prosesdən yayınma halları Moskvanın danışıqlarda səmimi olmadığını göstərir.
A. Qurbanova xatırladıb ki, Tramp administrasiyası hakimiyyətə gəldiyi ilk mərhələdə Putinlə münasibətlər fonunda Rusiya-Ukrayna müharibəsinə dair müsbət mesajlar verilmiş və atəşkəsin ümumi prinsipləri razılaşdırılmışdı: “Lakin həmin mərhələdə Zelenskinin hakimiyyət legitimliyi sual altına qoyulmuş və Ukraynanın iştirakı olmadan prosesin həllinə cəhdlər edilmişdi. Bu isə danışıqların davamlılığını şübhə altına almışdı. ABŞ və Avropa İttifaqının (Aİ) son dövrlərdə Ukraynaya münasibətdə ortaq mövqe nümayiş etdirməsi Rusiya üzərində siyasi təzyiqlərin artmasına səbəb olub. ABŞ dəfələrlə atəşkəsin əldə olunması üçün Rusiyaya konkret mesajlar versə də, Moskva daha sərt və qəbulolunmaz tələblərlə çıxış edir”.
Müsahibimiz qeyd edib ki, bu tələblər — Kurskun qeyd-şərtsiz azad olunması və bəzi ərazilərlə bağlı geri çəkilmə məsələləri — nəinki Ukrayna, heç beynəlxalq ictimaiyyət üçün də qəbuledilməzdir: “Rusiya müharibəni sonlandırmaq üçün real iradə ortaya qoymur. Əksinə, daha əlverişli şərtlərlə atəşkəsə nail olmağa çalışır və bu proses nə qədər uzansa, regionda vəziyyət bir o qədər gərginləşəcək. Əgər Rusiya konstruktiv mövqe sərgiləməsə, hərbi əməliyyatların daha da genişlənməsi, hətta üçüncü və dördüncü tərəflərin də münaqişəyə cəlb olunması riski real görünür. Bu isə yeni mərhələdə münaqişənin daha ciddi nəticələrə səbəb ola biləcəyini göstərir”.
Zəhra Ağayeva
13:03 06.04.2025
Oxunuş sayı: 27348
