Azərbaycan regionun enerji təhlükəsizliyinə töhfə verən yeni alternativ mənbədir - Şərh
Enerji təhlükəsizliyi müasir dünyada milli təhlükəsizlik strategiyalarının ən əsas elementlərindən birinə çevrilmişdir. Enerji resurslarının etibarlı təchizatı, təhlükəsiz saxlanılması və davamlı istehlakı bir ölkənin iqtisadi sabitliyini və sosial inkişafını təmin edən əsas amillərdir. Ölkələr arasındakı geosiyasi münasibətlərin və qlobal enerji bazarındakı qeyri-sabitliyin artdığı bir dövrdə enerji təhlükəsizliyi milli maraqların qorunmasında mühüm rol oynayır.
Cənab Prezident İlham Əliyev Cənub Qaz Dəhlizi Məşvərət Şurasının 11-ci və Yaşıl Enerji Məşvərət Şurasının 3-cü nazirlər iclasında çıxışı zamanı enerji təhlükəsizliyinin aktuallığını bir daha vurğulayıb: “Bu gün heç vaxt olmadığı qədər enerji təhlükəsizliyi milli təhlükəsizliyin, ölkələrin təhlükəsizliyinin ayrılmaz bir hissəsidir və bu gün biz, həmçinin sənaye təhlükəsizliyi haqqında danışa bilərik. Sənayenin inkişafı üçün enerji ehtiyatları, neft-kimya məhsulları və gübrələr vacibdir. Azərbaycan isə xam neftin, təbii qazın, neft məhsullarının və gübrələrin istehsalçısı və ixracatçısıdır”.
Cənab Prezidentin çıxışı Azərbaycanın bu sahələrdə strateji mövqeyini həm regional, həm də beynəlxalq miqyasda bir daha təsdiq edir. Azərbaycanın enerji təhlükəsizliyi ilə bağlı strategiyaları yalnız milli maraqları deyil, həmçinin qlobal əməkdaşlıq imkanlarını genişləndirir.
Mövzu ilə bağlı Crossmedia.az-a açıqlama verən Milli Məclisin deputatı Vüqar Bayramov ilk olaraq bildirib ki, enerji təhlükəsizliyi milli təhlükəsizliyin formalaşmasında xüsusi paya malikdir:
“Azərbaycanda həyata keçirilən enerji strategiyası bir tərəfdən ölkənin milli təhlükəsizliyinin möhkəmləndirilməsinə mühüm töhfələr verir, digər tərəfdən isə regional təhlükəsizliyin təmin olunmasında ciddi rol oynayır. Azərbaycan bu gün Avropa və region ölkələrinin enerji tələbinin ödənilməsində yeni alternativ mənbə kimi tanınır. Xüsusilə, Azərbaycanın Avropaya mavi qaz hasilatında ardıcıl artımlar müşahidə edilir. Növbəti 2 il üçün bu göstəricinin 20 milyard kubmetrə qədər artması gözlənilir ki, bu da Azərbaycanın enerji sahəsində regional və qlobal miqyasda mövqeyini daha da gücləndirir. 2020-ci ilin dekabr ayından başlayaraq, Azərbaycan qazının Avropa bazarına daxil olması regional enerji təhlükəsizliyinə əhəmiyyətli bir töhfə verib”.
Bu cür strateji təşəbbüslər Azərbaycanı enerji bazarının əsas oyunçularından birinə çevirərək, onun beynəlxalq siyasi və iqtisadi nüfuzunu artırır:
“Enerji siyasəti yalnız enerji istehlakı və ixracını deyil, həm də digər sektorlarda, xüsusilə sənayenin inkişafında mühüm təsir göstərir. Sənaye məhsullarının istehsalında enerji resurslarının əhəmiyyəti inkaredilməzdir. Bununla yanaşı, enerji siyasətinin düzgün idarə olunması iqtisadiyyatın diversifikasiyası və dayanıqlı inkişaf kimi fundamental məqsədləri dəstəkləyir. Azərbaycan birmənalı şəkildə bu gün regionun enerji təhlükəsizliyinə töhfə verən yeni alternativ mənbə kimi regionun aparıcı enerji ölkələrindən biridir”,- deyə deputat fikrini yekunlaşdırıb.
Nəzrin Salmanova
11:42 04.04.2025
Oxunuş sayı: 840
