"DQR"in təmsilçiliyi ləgv edilməsi Azərbaycanın gücünün göstəricisidir - AÇIQLAMA
Son günlərdə qondarma "Dağlıq Qarabağ Respublikası"nın Rusiyadakı nümayəndəliyinin fəaliyyətinin dayandırılması, həm Azərbaycan, həm də beynəlxalq ictimaiyyət üçün xüsusi əhəmiyyət kəsb edən bir hadisə oldu.
Bildiyimiz kimi, Qondarma "Dağlıq Qarabağ Respublikası"nın Rusiyadakı nümayəndəliyi 1991-ci ildə fəaliyyətə başlayıb. Bu qurum keçmiş Dağlıq Qarabağ münaqişəsi ilə bağlı separatçı ideologiyanı təbliğ etmək məqsədilə yaradılıb. Lakin 2023-cü ilin sentyabrında qondarma rejimin prezidenti Samvel Şahramanyanın imzaladığı fərmana əsasən, nümayəndəliyin fəaliyyəti 1 yanvar 2024-cü ildən etibarən tamamilə dayandırılıb.
Son zamanlarda Moskva Cənubi Qafqazda vəziyyətin sabitləşməsi və münaqişənin həllinə dair daha konstruktiv yanaşmaların təqib edilməsi yönündə adımlar atmağa başlayıb. Bu yanaşma, Dağlıq Qarabağdakı separatçı qüvvələrin Rusiya tərəfindən dəstəklənməsinin azaldılmasına və nəticədə nümayəndəliyin fəaliyyətinin dayandırılmasına gətirib çıxarıb.
Crossmedia.az mövzu ilə potiloq Aydın Quliyevə müraciət edib.
Politoloq ilk olaraq bildirib ki, əslində bu, gözlənilən bir nəticə idi:
“Dağlıq Qarabağ münaqişəsi tam şəkildə həll olunub, torpaqlar işğaldan azad edilib və Rusiyanın sülhməramlı qüvvələri bölgəni tərk edib. Bununla yanaşı, qondarma "Arsax" adlanan qondarma qurum ləğv edilib, ideoloqları və liderləri hazırda Bakıda ittiham olunur. Belə olan halda, bu qondarma qurumun nümayəndəliyinin Rusiyada fəaliyyət göstərməsinin heç bir mənası qalmayıb. Qurumun öz fəaliyyətini dayandırması, Vətən müharibəsindən sonra yaranmış yeni geosiyasi reallıqların bir göstəricisidir. Artıq Ermənistan və dünyanın əksər dövlətləri Azərbaycanın ərazi bütövlüyünü dəyişməz prinsip kimi qəbul etməlidir. Bu vəziyyətdə separatçı dövlət qurumlarının yaradılmasına heç bir əsas yoxdu. Eyni zamanda, bu onun ifadəsidir ki, qondarma Arsax qurumunun və erməni şovinizminin başında dayananlar artıq Rusiyadan lazımi dəstəyi ala bilməyəcəklərinə əmin oldular. Onlar Rusiyanın bölgədə siyasətinin dəyişdiyini və dəyişməli olduğunu anladılar.
Onun sözlərinə görə, Rusiya artıq Cənubi Qafqazda erməni separatizminə və Azərbaycanı cəzalandırmaq siyasətinə son qoymaq niyyətindədir:
“Bu siyasət bölgəyə fəlakət gətirməkdən başqa, Rusiyanın özünə də heç bir fayda vermədi. Nəticədə qondarma Arsax qurumunun rəhbərləri Rusiyadan dəstək ala bilmədikləri üçün bu qurumu buraxmaq məcburiyyətində qaldılar. Qurumun ləğvi dünyaya əhəmiyyətli bir mesajdır. Bu mesajın mahiyyəti ondan ibarətdir ki, əgər indiyə qədər “Arsax” probleminin əsas təşəbbüskarı Kreml idisə və Kreml artıq bu separatizmə dəstəkdən imtina edirsə, dünyanın digər güc mərkəzləri də eyni addımı atmalı və Azərbaycandakı erməni separatizmini dəstəkləmək planlarından tamamilə uzaqlaşmalıdırlar. Qondarma “Arsax” qurumunun Rusiya öz fəaliyyətini dayandırması həm dünya üçün bir mesajdır, həm də Ermənistan hakimiyyəti və cəmiyyəti üçün bir xəbərdarlıqdır. Çox güman ki, biz “Arsax” qurumunun ləğvinin nəticələrini Ermənistanın daxili siyasətində də müşahidə edəcəyik. Qondarma Arsax qurumu ideologiyasının tərəfdarlarının Ermənistanın daxili siyasətindəki mövqeləri bundan sonra daha da sarsılacaq”,- deyə A.Quliyev fikrini yekunlaşdırıb.
Nəzrin Salmanova
16:40 03.04.2025
Oxunuş sayı: 987
