Qırğızıstan və Macarıstan arasında birbaşa hava reysləri açıla bilər
1 aprel 2025-ci il tarixində Qırğızıstanın Joqorku Keneşinin Nəqliyyat, Kommunikasiya, Memarlıq və Tikinti Komitəsi Qırğızıstan Nazirlər Kabineti ilə Macarıstan hökuməti arasında hava əlaqəsinə dair Sazişin ratifikasiyası haqqında qanun layihəsini birinci oxunuşda təsdiqləyib.
Crossmedia.az xarici KİV-ə istinadən xəbər verir ki , sənəd 5 noyabr 2024-cü ildə Bişkekdə imzalanıb.
Qırğızıstan Nazirlər Kabineti yanında Mülki Aviasiya Dövlət Agentliyinin direktor müavini Kanat Tologonovun sözlərinə görə, bu saziş müntəzəm reyslərin, o cümlədən sərnişin, yük və poçt daşımalarının həyata keçirilməsi üçün hüquqi əsas yaradacaq.
“O, iki ölkə arasında bütün əsas sahələrdə əməkdaşlığın dərinləşməsinə təkan verəcək”, – Tologonov bildirib.
Müzakirələr zamanı deputat Uluqbek Ormonov Qırğızıstanın Beynəlxalq Mülki Aviasiya Təşkilatının (ICAO) qara siyahısından çıxarılması istiqamətində işlərin nəticəsiz qalmasını gündəmə gətirib. O, həmçinin praktikada icra olunmayan sazişlərin effektivliyinə şübhə ilə yanaşıb.
Fatimə Məmmədova
09:16 02.04.2025
Oxunuş sayı: 638
