İran və ABŞ arasında gərginlik artır: Hərbi zərbələr mümkündür
İran ABŞ-nin nüvə obyektlərinə hücum planlarına qarşı hərbi addımlarla cavab verə biləcəyini bəyan edib.
Crossmedia.az xəbər verir ki, bu barədə ABŞ-nin Müharibə Araşdırmaları İnstitutu yazıb.
Qeyd olunub ki, bu təhdidlər, ABŞ-nin İranın nüvə proqramına qarşı yeni hücum planlarını gündəmə gətirməsi fonunda səsləndirilib.
ABŞ Prezidenti Donald Tramp martın 30-da bildirib ki, İran yeni nüvə sazişi imzalamasa, “bombardman olacaq”. Tramp əlavə edib ki, əgər İran danışıqlarda irəliləyiş əldə etməsə, ona qarşı ikinci dərəcəli tariflər tətbiq ediləcək. Bu tariflər İrana ticarət edən ölkələrə də sanksiyalar tətbiq etməyi nəzərdə tutur.
Məlumata görə, ABŞ rəsmiləri daha əvvəl də İranla birbaşa danışıqlar baş tutmadığı təqdirdə hərbi müdaxilə ehtimalını gündəmə gətirmişdi. İran isə yalnız dolayı yolla aparılan danışıqlara açıq olduğunu, birbaşa danışıqları qəbul etmədiyini bildirib.
Yanvar ayından bəri İranın yüksək vəzifəli rəsmiləri ABŞ və İsrailin mümkün hücumlarına qarşı cavab zərbələri endirəcəklərini dəfələrlə vurğulayıblar. Martın 29-da "The Telegraph" nəşrinə danışan yüksək rütbəli İran hərbçisi bildirib ki, İrana hücum üçün istifadə edilən hər bir baza hədəf alınacaq.
Bundan əlavə, İranın ABŞ müttəfiqlərinə qarşı yönələn təhdidləri, onların ərazilərində ABŞ hərbi bazalarının istifadəsinə mane olmaq məqsədi daşıya bilər. Tehranın bu addımı, müttəfiq ölkələrin İranın potensial cavab tədbirlərindən ehtiyatlanaraq ABŞ-ə dəstək verməsini məhdudlaşdırmağa yönəlmiş ola bilər.
Xumar Emilqızı
23:25 01.04.2025
Oxunuş sayı: 9865
